Búgin Petropavlda bes qabatty úiden órt shyǵyp, 36 adam, sonyń ishinde 11 bala qaýipsiz jerge shyǵaryldy, dep habarlaidy "Ult aqparat".
Soltústik Qazaqstan oblystyq Tótenshe jaǵdailar departamenti baspasóz qyzmetiniń málimetinshe, K.Sútishev kóshesi, 51-úiden órt shyqqandyǵy jóninde habar saǵat 11.30 shamasynda túsken. Oqiǵa ornyna jetken qutqarýshylar bes qabatty úidiń úshinshi qabatyndaǵy páterdiń balkony janyp jatqanyn kórip, birden iske kirisken. Tútinge oranǵan podezden 36 turǵyndy, sonyń ishinde 11 balany qaýipsiz jerge shyǵardy.
Saǵat 12.00 shamasynda jalyn tolyǵymen sóndirildi. Órt sóndirýshilerdiń jedel qimyly arqasynda basqa páterlerge zaqym kelgen joq. Alaida, ot tutanǵan baspananyń jáne onyń balkonynyń terezesi janyp ketti. Sondai-aq úi múlkine zaqym keldi. Qazir órttiń shyǵý sebebi jáne kelgen shyǵyn mólsheri anyqtalyp jatyr.
Mamandardyń aitýynsha, jyl basynan oblysta 181 órt tirkelip, 16 adam, sonyń ishinde eki bala qaza tapty.
