Petropavlda 9 qabatty úidiń balkondarynyń birinde órt shyǵyp, páter iesi qaza tapty, dep habarlaidy "Ult aqparat".
Soltústik Qazaqstan oblystyq Tótenshe jaǵdailar departamenti baspasóz qyzmetiniń málimetinshe, Petropavldaǵy Jýkov kóshesi, 23-úide órt keshe, shamamen saǵat 15.00 shamasynda shyqqan. Toǵyz qabatty úidiń 4-qabatyndaǵy páterlerdiń birinde balkon órtengen. Keiin ol páterge aýysqan.
Oqiǵa ornyna jetken órt sóndirýshiler 45 adamdy, sonyń ishinde 6 balany qaýipsiz jerge shyǵardy. Al páter iesi – 80 jastaǵy áiel mert boldy.
«Órttiń ázirge neden shyqqany belgisiz. Oqiǵa ornynda 7 tehnika, 28 maman jumys istedi. Jalpy, ótken aptada 27 órt tirkelse, sonyń 23-i jeke sektorda bolǵan, turǵyn úiden bólek monshalar, qora-qopsylar janǵan. Órt negizinen buzylǵan peshten jáne elektr symdarynyń qysqa tuiyqtalýynan, qaýipsizdik erejelerin saqtamaýdan shyqqan», - deidi SQO TJD bastyǵynyń mindetin atqarýshy Murat Qanǵojinov.
Al Taiynsha aýdanynda eki adam órtten zardap shekti.
«Jeke turǵyn úilerdiń biriniń garajynda eki adam kólik jóndegen. Gaz qospasy janyp, órt búkil garajǵa taraǵan. Saldarynan 35 jáne 40 jastaǵy eki er adam jaraqat aldy. Olardyń betteri men qoldary kúigen. Zardap shekkender aýdandyq ortalyq aýrýhanaǵa jatqyzyldy. Er adamdar 1-2 deńgeili kúiik alǵan, olardyń deneleriniń 10% órt sharpyǵan», - deidi Murat Qanǵojinov.
Jalpy jyl basynan SQO-da órtte 44 adam qaza tapty, onyń beseýi – bala. 18 adam dene jaraqatyn aldy.
