Soltústik Qazaqstan oblysynyń Petropavl qalasynda jumysshylar qalyń qardyń astynda qalǵan kóshedegi shópti shaýyp, turǵyndardyń qyzý talqysyna tústi, dep habarlaidy "Ult aqparat".
1 jeltoqsan kúni áleýmettik jelilerde Petropavlda qar astyndaǵy shópti shapqan jumysshylar týraly video tarady. Ony qala turǵyndarynyń biri úiiniń terezesinen túsirgen. Qoldaryna trimmer ustap, qystygúni shóp shaýyp júrgenderdiń áreketi birden jergilikti pablikterge tarap, oqyrmandardyń qyzý talqysyna tústi.
Aldaǵy kúnderi Soltústik Qazaqstan oblysyna Premer-Ministr Asqar Maminniń sapary josparlanǵan. Kópshilik bul jumystardy osyǵan orai atqarylǵanymen bailanystyrdy.
Petropavl qalasy ákimdiginiń baspasóz qyzmeti málim etkendei, ákimdiktiń bul jumystarǵa esh qatysy joq. Oblys ortalyǵyndaǵy ZIKSTO zaýyty óz yntasymen ainaladaǵy aýmaqty retke keltirýge shyqqan.
Al ZIKSTO zaýyty mundai jumystardy júrgizbegenin aitýda.
«Videoda aialdama anyq kórinedi. Jumysshylar kóshede, aialdamanyń qasyndaǵy shópti shaýyp júr. Biz mundai jumystardy atqarǵan emespiz. Bizde tipti, shóp shabýǵa arnalǵan trimmerler de joq», - dep jaýap berdi tilshige ZIKSTO zaýytynan.
