Soltústik Qazaqstan oblysynyń ákimi Qumar Aqsaqalov brifing ótkizip, Petropavlda kelesi aptadan bastap karantin rejimi jeńildetetinin jetkizdi, dep habarlaidy "Ult aqparat".
SQO ákimi Qumar Aqsaqalov brifingte shekteýler jaǵdaidy tolyq baqylaýǵa alýǵa septigin tigizip, karantindi kúsheitý oń nátije bergenin atap ótti.
«9 aidan beri karantin rejiminde ómir súrip kelemiz. Bul kezeń eshkimge ońai tigen joq. Bárine túsinistikpen qaraǵan oblys turǵyndaryna alǵys aitamyn. Qatań karantin - qajetti shara. Bir ai buryn qala jabylyp, PTR test bolmasa ótýge tyiym salyndy. Óńir turǵyndary ýaqytsha qiyndyq kórdi. Endi jaǵdaidyń turaqtalýyna bailanysty 14 jeltoqsan saǵat 00:00-den bastap biz oblys ortalyǵyndaǵy karantin rejimin álsiretemiz. Petropavl qalasynyń mańyndaǵy beketter alynady», - dedi Qumar Aqsaqalov.
Budan basqa oblys ortalyǵynda demalys kúnderi qoǵamdyq kólik jumys istemek. Oblys boiynsha avtobýs qatynasy retke keledi.
Kitaphanalar, murajailar, teatrlar, dini nysandar qaita ashylady.
Barlyq saýda ortalyqtary men azyq-túlik emes dúkender tańǵy saǵat 10.00 men keshki 22.00-ge deiin jumys isteidi. Biraq jeksenbi kúni jabyq bolady. Saýda ortalyǵyndaǵy sýpermarketter saǵat 24.00–ge deiin ashylady. Jabyq bazarlar tańǵy saǵat 9.00-den 20.00-ge deiin jumys istese, ashyq bazarlardyń jumysyna shekteý qoiylmaidy.
Demalys jáne mereke kúnderi sulýlyq salondary da klientterdi qabyldai alady. Dámhanalar men meiramhanalar ieleriniń suraýy boiynsha jumys ýaqyty saǵat 22.00-ge deiin uzartyldy. Jeksenbi kúni tek tamaqty jetkizýmen ǵana ainalysa alady.
Qonaq úiler men týrizm nysandary tek 80 % tolýy kerek. Týristik nysandar, fitnes jáne sport zaldary, basseinder, sporttyq nysandar, balalarǵa bilim berý mekemeleri jeksenbide ǵana jumys istemeidi.
«Kóp shekteýler alynady, biraq virýspen kúres toqtamaidy. Ár adamnan jaýapkershilik kútemiz. Bárimiz jeke qaýipsizdik týraly oilaýymyz kerek. Otbasynyń aman-saýlyǵy birinshi orynda turýy tiis. Bizdi alda Táýelsizdik kúni merekesi kútip tur. Jańa jyl da jaqyndap qaldy. Meiramdardy úide, otbasymen birge atap ótýge shaqyramyn», - dedi óńir basshysy brifingte.
Qumar Aqsaqalovtyń aitýynsha, oblystaǵy jaǵdai qalpyna kelip, aýyrǵandardyń sany odan saiyn azaisa, jeksenbilik shekteýler de alynyp tastalmaq.
