Petropavlda Magnum Cash & Carry saýda jelisiniń basshylyǵynan aqsha bopsalaǵandarǵa qatysty sot protsesi bastaldy. Qos bloger kásipkerden 50 mln teńge berýin talap etken, dep habarlaidy "Ult aqparat" Qazaqstan Media basylymyna silteme jasap.
Sot protsessi barysynda belgili bolǵandai, Robert Podlasov pen Sergei Saiko birneshe jyl buryn YouTube jáne Instagram áleýmettik jelisinde akkaýnt ashyp, qaladaǵy sýpermarketterde reidter uiymdastyrǵan. Keiin saýda oryndaryndaǵy búlingen taýarlardy túsirip, ony atalǵan paraqshada jariialap otyrǵan. Osylaisha, tutynýshylardyń quqyǵyn qorǵamaq bolǵan-mys.
«Sergei Saiko men Robert Podlasov ózderin ádildik úshin kúresýshiler dep sanaǵan. Al olardyń ár jariialaǵan jazbalary saýda jelilerine nuqsan keltirip otyrǵan. Munymen toqtamaǵan olar keide saýda oryndaryna baryp sýsyndardy ashyp, taýarlardy ádeii aralastyryp, búldirip ketip otyrǵan. Sodan soń memlekettik organdarǵa anyqtalǵan zań buzýshylyqtar týraly shaǵymdardy jibergen», – dedi memlekettik aiyptaýshy, Petropavl qalalyq prokýratýrasynyń bólim basshysy Iýliia Sysoeva.
Al 2023 jyldyń maýsym aiynda blogerler «Tatkraft-Invest» JShS direktory Andrei Isakovpen kezdesip, osyndai jazbalardy jariialamaý úshin aqsha talap etken. Sóitip, olar kásipkerden ai saiyn 200 myń teńge kóleminde qarjy alyp otyrǵan.
«Kásipker Isakov olarǵa 2023 jyldyń 27 shildesinde, keiin 24 tamyzda, 23 qyrkúiekte jáne 22 qazanda 200 myń teńgeden aýdaryp otyrǵan. Qarjy Podlasov pen Saikonyń esepshottaryna túsken. Osylaisha, olar kásipkerge 1 million teńge kóleminde shyǵyn keltirgen. Óz áreketteriniń zańsyzdyǵyn sezine otyryp, Saiko men Podlasov keiin osyndai jolmen Magnum Cash & Carry saýda jelisiniń óńirlik basshylyǵynan aqsha bopsalaǵan. Olar óz áreketterin toqtatý úshin kásipkerden 50 mln teńge berýin talap etken», – dep málimdedi sot otyrysy barysynda memlekettik aiyptaýshy.
Saýda jelisiniń óńirlik direktory bul týraly politsiiaǵa habarlaǵan. Sóitip, qos tarap 2023 jyldyń qarasha aiynyń 16-sy S. Muqanov kóshesi boiyndaǵy «Semeinyi» saýda ortalyǵynda kezdesedi. Sol kezde kásipker Sergei Saiko men Robert Podlasovqa 25 mln teńge ustatqan.
«Qarjynyń 20 mln teńgesi politseiler kásipkerge bergen «jalǵan aqsha» bolatyn. Qarjyny alǵan Saiko men Podlasov taksige otyryp ketip qalǵan. Kóp uzamai olardy politsiia qyzmetkerleri ustady. Olardan bopsalaǵan qarjy tárkilendi», – dedi Iýliia Sysoeva.
Sot protsessi barysynda Robert Podlasov pen Sergei Saiko jáne olardyń qorǵaýshylary ózderin sýretke túsirýge qarsy boldy. Esesine, isti alqabilerdiń qatysýymen qaraýdy surady.
SQO Qylmystyq ister jónindegi mamandandyrylǵan aýdanaralyq sottyń sýdiasy Sáýle Litfýllina olardyń ótinishin qanaǵattandyrdy.
Aita keteiik, blogerler QR QK 194-baby 2-bóligi, 2-tarmaǵy jáne 194-baptyń 4-bóligi boiynsha aiyptalyp otyr. Olar 15 jylǵa deiin bas bostandyǵynan aiyrylýy múmkin.
