Petropavlda kómir tapshylyǵy týdy, temirjol tuiyqtarynda turǵyndar «qara altyndy» izdep sendelip júr, dep habarlaidy QazAqparat.
Petropavldaǵy temirjol tuiyqtarynda júk kólikteri jinalyp qalǵan. Keibir júrgizýshiler kúte-kúte úilerine bos qaityp jatyr. Solardyń biri - Bolat degen azamat. 20 adamnan kómirdi túsirip berýge tapsyrys alǵan ol oblys ortalyǵyndaǵy barlyq kómir qoimalaryn aralap shyǵypty.
«Petropavldaǵy barlyq temirjol tuiyqtarynda kómir joq. Bul jaǵdaiǵa 4-5 kún boldy. Osymen kún kórip otyrǵan edim, búgingi kúnim taǵy da zaia ketti», - deidi Petropavl turǵyny.
Soltústik Qazaqstan oblystyq energetika jáne turǵyn úi-kommýnaldyq sharýashylyǵy basqarmasynyń málimetinshe, óńir qys maýsymynda shamamen 400 myń tonnaǵa jýyq qatty otyn tutynady. Oblysqa «qara altyn» Ekibastuz, Maikóbe, Qarajyra men Shubarkól ken oryndarynan jetkiziledi.
«391 myń tonna kómir qajet bolsa, sonyń 363 myńy óńirge jetti. Bul – 93 %. Qazir temirjol tuiyqtarynda 19 myń tonna kómir jatyr, onyń 560 tonnasy Petropavlda. Qazir Petropavlǵa 490 tonna maikóbe, 280 tonna qarajyra kele jatyr. Ádette qyrkúiek-jeltoqsan ailarynda qatty otynǵa suranys kúrt artady. Sol sebepti biz jaz boiy turǵyndardy kómirdi erterek alyp qoiýǵa shaqyrdyq. Baǵa qymbattaǵan joq, 8,7 myń men 17 myń teńge aralyǵynda saýdalanyp jatyr», - deidi SQO energetika jáne turǵyn úi-kommýnaldyq sharýashylyǵy basqarmasy basshysynyń mindetin atqarýshy Baqyt Iliiasov.
