Petropavldaǵy demalys bazalarynyń birinde bes jigit 17 jastaǵy qyzdy zorlady dep kúdikke ilindi. Onyń úsheýi qamaldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, 11 maýsym kúni politsiiaǵa «Berezovaia rosha» demalys bazasynyń aýmaǵynda qyzynyń zorlanǵanyn aityp Petropavl turǵyny aryzdandy.
Atalǵan fakti sotqa deiingi tergep-tekserýlerdiń biryńǵai tizilimine «Zorlaý» jáne «Seksýaldyq sipattaǵy zorlyq-zombylyq áreketteri» baptary boiynsha engizildi.
17 jastaǵy qyzǵa qatysty qylmys jasady degen kúdikpen demalys bazasynyń aýmaǵynda demalǵan Petropavl qalasynyń 17 men 20 jas aralyǵyndaǵy bes turǵyny ustaldy.
Úsheýi ýaqytsha izoliatorǵa qamaldy, qalǵan ekeýine qatysty bultartpaý sharasyn taǵaiyndaý týraly másele tergeý áreketteriniń nátijeleri boiynsha sheshiledi.
Qazir sotqa deiingi tergeý aiasynda sot saraptamalary taǵaiyndalyp, tergeý júrgizilip jatyr.
