Petropavl turǵyny internet-alaiaqtardyń quryǵyna túsip, jiǵan-tergen 7 mln jáne nesiege alǵan 5 mln teńgesinen aiyrylyp qaldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, petropavldyq áiel ulynyń oqýyna dep depozitke aqsha jinaǵan.
Alaida internet-alaiaqtardyń arbaýyna túsip, bir kúnde bar qarajatynan aiyrylyp qaldy.
Naýryz aiynyń ortasynda oǵan banktiń qaýipsizdik qyzmetiniń qyzmetkerimin jáne banktiń menedjerimin dep tanystyrǵan belgisiz er adam men qyz habarlasqan.
Olar onyń atyna 7 minýt buryn bóten adamnyń iri kólemde nesie resimdegenin aityp, qala turǵynyn sendirgen.
Alaiaqtardyń áreketterinen qorǵaný úshin oǵan «esepshotty jańartý» qajettigin, iaǵni depozitten aqshany alyp, jańa ashylǵan esepshotqa salýdy usynǵan.
Jábirlenýshi habarlasqan adamdarǵa kópke deiin senbegen, bank filialyna baratynyn aitqan.
Alaida qylmyskerler ony bulai jasamaýǵa kóndiredi. Áielge barlyq qarajat qaitarylady dep ýáde bergen.
Jábirlenýshi alaiaqtardyń nusqaýyn túgel oryndap, óziniń 7 mln teńgeden astam aqshasyn, alǵan nesiesin birneshe Qiwi-ámiiannyń esepshotyna aýdaryp jibergen.
Jalpy alǵanda qylmyskerler 11 mln 865 myń teńgeni qoldy qylǵan.
Aldanǵanyn bilgen áiel politsiiaǵa júgindi. Bul fakti «Alaiaqtyq» baby boiynsha Sotqa deiingi tergep-tekserýdiń biryńǵai tizilimine engizildi. Kriminaldyq politsiia qyzmetkerleri jedel-izdestirý sharalaryn júrgizip jatyr.
«Búginde «banktiń qaýipsizdik qyzmetinenbiz» dep qońyraý shalý arqyly aldaý - eń keń taralǵan tásilderdiń biri. Oǵan qazir kóbi sene bermeidi, sebebi adamdar kiberqylmyskerlerdiń bul amaly jaily biledi. Soǵan qaramastan, keide qaskóiler ózderiniń qurbandaryna psihologiialyq qysym jasaý arqyly sheberlik tanytady. Telefon shalǵan jaǵdaida kúmán týsa, bank filialyna baryp qana shottyń jaǵdaiy jaily bilý kerek. Naqty bank qyzmetkerleri qandai jaǵdai bolmasyn, eshqashan klientterge telefon arqyly qarjylyq operatsiialar jasamaidy, qupiia derekterdi ataýdy talap etpeidi», - deidi SQO politsiia departamenti kriminaldyq politsiia basqarmasy bastyǵynyń orynbasary Marat Jumaliev.
Jalpy oblysta jyl basynan beri 202 internet-alaiaqtyq tirkeldi. Onyń 52-sinde qylmyskerler ózderin «banktiń qaýipsizdik qyzmetiniń qyzmetkerimiz» dep tanystyrǵan.
