Petropavlda áleýmettik jeli arqyly ekstremistik maǵynadaǵy materialdardy saqtap, taratqan destrýktivti dini aǵymnyń ókili jazaǵa tartyldy, dep habarlaidy "Ult aqparat".
Soltústik Qazaqstan oblysy politsiia departamenti baspasóz qyzmetiniń málimetinshe, tártip saqshylary zań buzýshyny «VKontakte» áleýmettik jelisine monitoring júrgizý barysynda anyqtaǵan. Ol óz paraqshasyna eldi alaýyzdyqqa shaqyratyn dini mazmundaǵy aýdiofaildar men fotomaterialdardy júktep, taratyp kelgen.
Jedel-izdestirý is-sharalaryn júrgizý barysynda jazbalardyń avtory anyqtaldy. Petropavldyń 33 jastaǵy turǵyny buryn sottalmaǵan. Áiel destrýktivti dini aǵymdardyń birin ustanady.
«Buqaralyq aqparat quraldarynyń ónimin, sol siiaqty ózge de ónimdi Qazaqstan Respýblikasynyń aýmaǵynda daiyndaý, saqtaý, ákelý, tasymaldaý, taratý» baby boiynsha oǵan qatysty material jinastyryldy. Tirkelgen kontent QR Aqparat jáne qoǵamdyq damý ministrliginiń Din isteri jónindegi komitetine dintaný saraptamasyna jiberildi. Sarapshylardyń qorytyndysy boiynsha materialdar ekstremistik bolyp tabylady jáne olardy el aýmaǵynda taratý men saqtaýǵa tyiym salynǵan.
8 qyrkúiek kúni Petropavl qalalyq mamandandyrylǵan ákimshilik sotynyń sheshimimen zań buzýshy jaýapqa tartyldy. Oǵan 20 AEK mólsherinde aiyppul salyndy.
«Turǵyndardyń destrýktivti dini aǵymdardy ustanýshylar qataryna qosylyp ketýin boldyrmaý úshin mamandar aldyn alý jumysyn júrgizedi. Qazirgi ýaqytta jańa ustanýshylardy óz qataryna tartý negizinen messendjerler men áleýmettik jeliler arqyly júzege asyrylady. Aǵymǵa tartýshy adam saqtyqpen áreket etedi. Dei turǵanmen, jyl basynan SQO aýmaǵynda din salasynda 13 quqyq buzýshylyq anyqtaldy. 8 quqyq buzýshy ákimshilik jaýapkershilikke tartyldy, qalǵandaryna dintaný saraptamalary taǵaiyndaldy», - dedi SQO Politsiia departamenti bastyǵynyń orynbasary Rýslan Nazarov.
