Nazarbaev Ýniversitetiniń tájiribesi negizinde 2 ozyq joǵary oqý orny qurylady. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy QazAqparat .
«Nazarbaev Ýniversitetiniń tájiribesi boiynsha innovatsiialar men serpindi tehnologiialardy damytý, ozyq ǵylymi-zertteý ortalyqtaryn qalyptastyrý úshin ósý ortalyqtary bolatyn 2 ozyq joǵary oqý orny qurylady. Petropavl men Shymkent qalalarynda osy jumys bastalyp ketti», - dedi Ashat Aimaǵambetov.
Onyń atap ótýinshe, elimizdiń básekege barynsha qabiletti 20 joǵary oqý ornynyń bazasynda «akademiialyq artyqshylyq» ortalyqtary qurylady.
«Bul jumys bastaldy. Bul maqsatta biýdjetten qomaqty qarjy bólý kózdelgen. Kriteriiler boiynsha 15 myqty óńirlik joǵary oqý orny jáne 5 myqty pedagogikalyq joǵary oqý orny iriktelip, laboratoriialary jańartylyp, jańa deńgeige kóteriledi», - dedi ministr.
Ashat Aimaǵambetovtiń aitýynsha, bilim sapasyn jaqsartý jónindegi sharalardy iske asyrý nátijesinde 2025 jylǵa qarai 3-6 jas aralyǵyndaǵy balalardy balabaqshamen qamtý 100 paiyzǵa jetkiziledi, 3 aýysymdy oqytý joiylady jáne 800 mektep salynady.
«PISA halyqaralyq zertteýinde oqýshylardyń nátijelerin 40 balǵa jaqsartý boiynsha jumys júrgiziledi. 15 ýniversitet dúniejúzilik reitingterde oryn alady. NEET sanatyndaǵy jastar úlesi tómendetiledi. 5000 mektepti jańǵyrtý josparda bar. Pedagogtermen qamtý máselesin tolyq sheshemiz. 20 zamanaýi, úzdik ýniversitet qalyptastyrý kózdeldi. Barlyq tapsyrma qatań baqylaýda bolady», - dedi ol.
