Memlekettik qyzmet isteri jáne sybailas jemqorlyqqa qarsy is-qimyl agenttiginiń SQO boiynsha departamenti Petropavl ákimi Marat Tasmaǵambetovke qatysty qyzmettik tergeý júrgizedi, - dep habarlaidy Tengrinews.kz Petropavlovsk.news portalyna silteme jasap.
Departament jetekshisiniń qyzmetin atqarýshy Janat Jumabaev agenttik BAQ-qa monitoring júrgizetinin málimdedi. Oqiǵa qala basshysynyń eńbek sińirgen agronomy, Petropavldyń qurmetti azamaty Ravil Riazanovqa daýys kótergen videoǵa bailanysty.
"Biz buqaralyq aqparat quraldary men áleýmettik jelilerge kúndelikti monitoring júrgizemiz. Sondyqtan bul jaǵdai týraly bilemiz jáne shara qoldanamyz. Eger etikalyq normalardy buzý deregi anyqtalsa, Petropavl ákimi jazaǵa tartylady", - deidi Janat Jumabaev.
Riazapov baýda jyrtqysh ańdardy asyraýǵa qarsy bolǵan, sol úshin Tasmaǵambetovten sóz estigen. Osy sátti jinalysqa qatysyp jatqandardyń biri telefonǵa túsirgen.
"Sondai boq aýyz sózder boldy, sumdyq! Munda áielder tur ǵoi dedim. Ol bolsa, ol baiaǵyda áiel bolýdan qalǵan, ol sheneýnik dedi. Osyny boqtyqpen aitty. Bul Botanikalyq baýda demalatyn keremet oryndar bar. Meniń usynǵanym: oryndyq, fontan, músinderdi jańartaiyq dedim. Al bizdikiler munda aiý, qasqyr men qaban ustamaq. Olarǵa kim qaraidy? Munda balalar keledi. Aiyna myńdaǵan bala. Bul botanikalyq keremetti kórý úshin jaqyn qalalardan keledi. Munda sýda meken etetinder, totyqustar men elikter bar. Biraq aiaq-asty aiýdy... Qalai... Men ózim aiýdan qorqamyn. Ol bolsa maǵan: óziń belgilerdi jinap alǵanyńmen, túkte uqpaisyń dep aitty", - deidi bolǵan jai týraly Ravil Riazapov.
Ǵalymnyń sózinshe, ákimmen janjalǵa ulasqan kelispeýshilik 14 maýsymda bolǵan.
Aita keteiik, Petropavl qalasynyń Botanikalyq baýyna 105 jyl bolǵan. Aýmaǵy eki gektardai jer. Dendrariide aǵashtyń eki myńdai túri bar.
