Petropavldaǵy tóbesi opyrylǵan mádeniet úiin jóndeýge 108 mln teńge kerek, dep habarlaidy QazAqparat.
Petropavl qalasy ákiminiń orynbasary Asqar Habibýlin tóbesi qulaǵan mádeniet úiine qatysty túsinik berdi.
«24 aqpan kúni qalalyq mádeniet úiiniń kórermender zalynda tóbeniń ishki jaǵy opyrylyp tústi. Eski tireýishter shydas bermegen. Saldarynan 500 sharshy metr aýmaq zaqymdaldy. Nysan jabyq tur, ǵimaratta kúzetshiden basqa eshkim joq.
Byltyr maýsym aiynda tóbeni ustap turǵan bes tireýish maiysyp, mádeniet úiin tolyq jabýǵa týra keldi. Ol kezde de balalar bolǵan joq, eshkim zardap shekpedi. Tiisti saraptama júrgizildi. Jyldyń sońynda osy nysanǵa qatysty jobalyq-smetalyq qujattar ázirlendi. Ǵimaratty jóndeý jáne qalpyna keltirý jumystaryna 108 mln teńge qajet. Qazir jóndeý jumystaryn júrgizýge konkýrs jariialandy. Naýryz aiynda qorytyndysy shyǵarylady», - dedi qala ákiminiń orynbasary.
Mádeniet úiinde ártisterden basqa 501 bala túrli úiirmelerge qatysyp kelgen. Úiirmeler basqa memlekettik mekemelerge ýaqytsha ornalastyryldy. Kei kásipkerlermen jalǵa alý boiynsha kelisimder jasaldy.
