Búginde aýadaǵy gazdardy ólsheitin arnaiy datchikter bar. Ondai qurylǵylardyń baǵasy da qymbat emes. QR Ishki ister ministrligi peshi bar árbir úige datchikterdi ornatýǵa keńes berip otyr, dep xabarlaidy QazAqparat tilshisi.
Vitse-ministr Iýrii Ilinniń aitýynsha, ázirshe atalǵan qurylǵylardy pesh jaǵyp otyrǵan árbir úige ornatý mindeti zańmen bekitilmegen. Aldaǵy ýaqytta ondai normany engizý josparlanyp otyr.
"Ashyǵyn aitý kerek, órt qaýipsizdigine arnalǵan sharalardy júrgizgende úidiń ieleri esikti ashpai qoiady. Al ashqan kúnniń ózinde ishke kirgizbeidi. Sodan bizdiń qyzmetkerlerimiz tabaldyryqta turyp, peshti qaýipsiz qoldanýdy túsindirip jatady. Endi, kei kezde úidiń ieleri kirýge, tipti, peshtiń ainalasyn qarap shyǵýǵa ruqsat beredi. Sol kezde mamandar óz aqyl-keńesterin aitady. Biraq kóp jaǵdaida adamdar úilerine kirgizbeidi. Oǵan qarsylyǵymyz joq. Sebebi bul - árbir azamattyń kostitýtsiialyq quqyǵy. Bizdiń inspektorlarymyz oǵan qarsy eshteńe istei almaidy. Degenmen, búginde biz jańa qurylys nysandaryna qatysty normalardy pysyqtap jatyrmyz. Sonda aýadaǵy iis jáne tabiǵi gazdyń kólemin ólsheitin datchikterdi ornatý máselesi eskeriledi. Jańadan salynǵan úidi paidalanýǵa bergende ondai qurylǵylardy mindetti túrde ornatý jaǵy qarastyrylady. Ishte turǵan datchikter birden signal beredi", - dedi Iu.Ilin jýrnalisterge bergen suxbatynda.
Onyń sózine qaraǵanda, respýblika boiynsha jeke menshik úilerde turatyn azamattar datchikterdi óz erkimen birtindep ornatyp jatyr. Biraq atalǵan kórsetkish tym tómen bolyp tur. Sebebi zańdy túrde ondai mindet jazylmaǵan.
"Negizi, buryn signal beretin datchikter bolmaǵan. Sol sebepti atalǵan qurylǵylar zańǵa engizilmedi. Qazir onyń bári bar. Osyǵan bailanysty biz ol datchikterdi ornatýǵa keńes beremiz. Baǵasy qymbat emes. Shamamen, 5 myń teńge. Eger adamnyń datchikti alýǵa aqshasy jetpese, onda ákimdikke xat jazýǵa bolady. Jergilikti bilik tótenshe jaǵdaidyń aldyn alý sharalary aiasynda kómek bere alady", - dep atap kórsetti Iu.Ilin.
Aita keteiik, búgin QR Ishki ister ministrligi Astanadaǵy qaiǵyly oqiǵanyń mán-jaiyn túsindirdi. Vitse-ministr Iýrii Ilin bes balanyń ómirin jalmap ketken órttiń aldyn ala sebebin de jariialady.
