© Sputnik / Abzal Kaliev
Munai salasyndaǵy jumysshylardyń máselesin sheshý úshin búkil júieni ózgertý kerek. Bul týraly Májilis depýtaty Azat Perýashev aitty, dep habarlaidy Sputnik Qazaqstan.
Onyń aitýynsha, munai salasy men jumysshylar arasyndaǵy tártipti qalpyna keltiretin kez keldi.
"Jumysshylar áleýmettik paket joq dep aityp jatyr. Tender eńbekaqyǵa nuqsanyn tigizip jatyr deidi. Másele bul oqiǵada emes. Másele júiede. Munai kompaniiasy men jumysshylardyń qarym-qatynasyn retteý kerek" - dep pikir bildirdi depýtat.
Sondai-aq ol ereýilge ne úshin barmaǵanyn aitty.
"Olar naqty bir organdarǵa – ministrlik pen ulttyq kompaniialarǵa talap qoidy. Árbir jerge bara bersem, óz jumysymdy qashan bitiremin. Parlamenttegiler órt sóndirýshiler emes. Bizdiń maqsatymyz – tiisti zańdardy qabyldaý, halyqtyń muń-muqtajyn sheshý. Qańtar oqiǵasynan keiin halyqtyń máselesin parlamentte talqylaýymyz kerek. Ol úshin tiisti qujattarymyz bar", - deidi Azat Perýashev.
Jumyssyz ereýilshilerdiń ushaq arqyly uiymdasqan túrde kelýi depýtattardyń kóńiline kúdik uialatqan.
"Eńbekaqy almaǵan 100-den astam adam uiymdasqan túrde ushaqpen ushyp kelýi kúdik týdyrady. Tenderdi basqa mekemege berdi dep talap qoiyp otyr. Bul talap orynsyz. Eger el aityp jatqan zańsyzdyq rasymen áshkerelenip jatsa, jemqorlyq máselesi anyqtalsa, zań júzinde shara qoldanylady. Al kompaniia jumysshylar arqyly óz máselesin sheshýge árekettengen bolsa, bul basqa másele, bul jaǵy da tekseriledi", - deidi Azat Perýashev.
