Búgin Almaty oblysyndaǵy Panfilov aýdanynyń ákimi Penjim aýylyndaǵy jaǵdai boiynsha turǵyndarmen kezdesti, dep habarlaidy QazAqparat.
Panfilov aýdany Penjim aýylyndaǵy oqýshylardyń 27 qazanda jasaǵan teris qylyǵy áleýmettik jelilerde kóp talqylandy. Búgin kenttiń Mádeniet úiinde másele oblystyq deńgeide kóterildi.
Janjal 9, 10 jáne 11-synyp oqýshylarynyń sózge kelise almaýynan bastalǵan bolatyn. Sońy 20-dan astam adam qatysqan jappai tóbeleske ulasty. Qaqtyǵys kezinde 2 adam zardap shekti.
Kezdesý barysynda jiynǵa qatysýshylar jastardyń buzaqylyǵyn talqylady.
«Men munda túni boiy boldym. Jastardyń jaýapsyz áreketin kórdim. Olar mektep janjalyn órshitip, jergilikti turǵyndarǵa ziian keltirdi. Men aqsaqaldardy, jergilikti turǵyndardy balalardy bir-birin qurmetteýge úiretýge shaqyrǵym keledi. Sizder ómir boiy osy jerde turasyzdar. Bir-birińizige dos, kórshi, baýyr, áriptessizder. Sizder qýanysh pen qaiǵy-qasiretti birge bólisesiz. Osy qundylyqtardyń barlyǵyn balalaryńyzǵa jetkizýlerińiz kerek», - dedi Panfilov aýdanynyń ákimi Talǵat Ómiráliev.
Aýyl turǵyndary da bir-birin qurmetteýge shaqyrdy.
«Jastar – eldiń bolashaǵy. Biz olardyń tárbiesine kóńil bólýimiz kerek. Mundai jaǵdailar arqyly búkil eldiń kóńilinde bizge qatysty teris pikir týyndaidy. Degenmen, aitqym kelgeni, bul ultaralyq qaqtyǵys emes. Osyndai jaǵdaidyń oryn alýy óskeleń urpaqty tárbieleýdegi olqylyqtardyń kórinisi dep bilemin. Oqiǵany órbitýdiń qajeti joq. Kei adamdar osy jaiytty teris maǵynada qoldanady. Olar keshegi kezdeisoq órtti sol oqiǵanyń saldary retinde kórsetýge tyrysty. Biraq bul olai emes jáne sizder bárin bilesizder. Bir-birimizdi qurmetteiik. Bizdiń elimiz de, jerimiz de – bir», - dedi Penjim aýylynyń turǵyny Aýtjan Hamraev.
Panfilov aýdanynyń ákimi Talǵat Ómiráliev bolǵan oqiǵada ultaralyq másele joqtyǵyn aitty.
«Qazir osy jerde ultaralyq úlken másele bar dep aita almaimyn. Bul jas balalar arasyndaǵy oryn alǵan jait. Iaǵni balalardyń tentektik tanytýynyń saldarynan oryn alǵan. Tek qana mektepten emes, úiden tárbie berý, bir-birin syilaýǵa úiretý kerek. Aýdan ákimi retinde ultaralyq máseleni kórip otyrǵanym joq. Tárbie jaǵyna úlken mán berýimiz qajet», - dedi aýdan ákimi.
Keshe Panfilov aýdany Penjim aýylynda oqýshylar arasynda jappai tóbeles bolǵanyn buǵan deiin habarlaǵan bolatynbyz.
Almaty oblystyq Politsiia departamenti baspasóz qyzmetiniń resmi aqparatyna sáikes, atalǵan fakti boiynsha QR QK 293-babynyń 2-bóligi boiynsha qylmystyq is qozǵaldy.
