AQSh qorǵanys ministrligi biyl Ýkrainaǵa USAI (Ukraine Security Assistance Initiative) bastamasy aiasynda 250 mln dollar kóleminde áskeri kómek beretinin rastady.
Pentagonnyń beisenbi kúni taratqan habarlamasynda bul qarajattyń jartysy áskeri saladaǵy reformalardyń júzege asý tiimdiligine bailanysty bolǵany aitylǵan. Ondaǵy aqparatqa sáikes, Ýkrainaǵa bul qarajat Resei agressiiasyna tótep bere alýy úshin qosymsha daiyndyq, jabdyq jáne keńes alý úshin beriledi.
Pentagon habarlamada Ýkrainany "Reseimen strategiialyq básekelestiktiń aldyńǵy qataryndaǵy mańyzdy áriptes" dep ataǵan. Onda sonymen birge AQSh ádettegidei Ýkrainanyń egemendigin jáne halyqaralyq qaýymdastyq moiyndaǵan territoriialyq tutastyǵyn qoldaidy delingen.
"RBK-Ýkraina" saitynyń jazýynsha, Ýkrainanyń qorǵanys ministrligi eldiń qorǵanys qabiletin arttyrýǵa kómekteskeni úshin amerikalyq áriptesterine alǵys aitqan. Kiev ýkrain úkimetiniń qaýipsizdik jáne qorǵanys salasyn reformalaý jáne NATO standarttaryna sáikestendirýge basty nazar aýdaryp otyrǵanyn aitqan.
Máskeý Ýkrainaǵa agressiia kórsetkenin jáne Donbastaǵy jaǵdaidy ýshyqtyrǵanyn ylǵi joqqa shyǵarady.
