Negativti internet-kontentti anyqtaý jáne zardap shekken balalarǵa der kezinde kómek kórsetý, pedagogtardyń etikaǵa sai emes is-áreket faktilerin jetkizý úshin QR Bilim jáne ǵylym ministrligi Telegram messendjerinde «Balalardy birge qorǵaiyq» chatyn ashty, dep habarlaidy "Ult aqparat" ministrliktiń baspasóz qyzmetine silteme jasap.
«Jasóspirimderdiń tóbelesi men pedagogtardyń etikaǵa sai emes is-áreketi bar beinejazbalardyń áleýmettik jelilerde taralǵany jurtshylyqty alańdatyp otyr. Osyǵan orai, QR Bilim jáne ǵylym ministrliginiń Balalardyń quqyqtaryn qorǵaý komiteti negativti internet-kontentti anyqtaý, sondai-aq, onyń odan ári taralýynyń aldyn alý jáne zardap shekken balalarǵa der kezinde kómek kórsetý boiynsha sharalar qabyldaý maqsatynda «Balalardy birge qorǵaiyq» Telegram chatyn qurdy. Kiberqaýipsizdikti belsendi túrde qadaǵalaý, ata-analarmen, balalarmen senimdi qarym-qatynas ornatý olardyń ómirinde kezdesetin qaiǵyly oqiǵalardyń aldyn alýǵa septigin tigizedi», - delingen habarlamada.
Atalǵan chatqa pedagogtar, psihologtar, bilim berý uiymdarynyń basshylary, oblystyq, aýdandyq jáne qalalyq bilim berý organdarynyń ókilderi, QR BǴM Balalardyń quqyqtaryn qorǵaý komitetiniń qyzmetkerleri engen.
«Búginde áleýmettik jeli bárine qoljetimdi, onda jasóspirimder qorqytý (býlling), bopsalaý sekildi keleńsiz jaitqa tap bolyp jatady.
Pedagogtar men ata-analar baiqap qalǵan negativti kontenti atalmysh topqa salady. Balalardyń quqyqtaryn qorǵaý komitetiniń mamandary óz kezeginde ýákiletti memlekettik organdarmen birlesip, zardap shekken balalarǵa kómek kórsetý jáne negativti kontenttiń odan ári taralýyna jol bermeý maqsatynda jedel sharalardy qolǵa alady», delingen habarlamada.
