Búgin Parlament Senatynda «Pedagog mártebesi týraly» zańynyń qabyldanýyna bailanysty Bilim jáne ǵylym ministri Ashat Aimaǵambetov bul salaǵa qansha qarjy jumsalatynyn aitty, dep habarlaidy QazAqparat.
«Bul zańdy júzege asyrýǵa qomaqty qarjy jumsalmaq. Eń bastysy, zańnamadaǵy qadamdar qajetti qarjymen jáne tetiktermen qamtylǵanyn, sáikesinshe, zań is júzinde jumys isteitinin atap ótken jón. 2024 jylǵa deiin zańdy iske asyrýǵa 5,3 trln teńge qajet bolady. Bul shynymen de óte qomaqty soma. Búginde memleket bilim salasyn qoldaý qajettigin túsinip otyr jáne tiisti qadamdardy jasaýda», - dedi ministr Senatta tilshiler saýalyna jaýap bere otyryp.
Budan buryn habarlanǵandai, Senattyń jalpy otyrysynda «Pedagog mártebesi týraly» zań qabyldandy.
Jalpy, zań jobasy tórt baǵytty qamtidy. Birinshiden, ustazdardyń quqyqtaryn keńeitý jáne ózine tán emes jumystardan bosatý, olardyń júktemesin azaitý. Ekinshiden, muǵalimniń qyzmetine qoiylatyn talaptardy kúsheitý. Úshinshiden, materialdyq emes yntalandyrý tetikteri, sondai-aq tórtinshiden, materialdy yntalandyrý qadamdary.
«Memleket basshysynyń Tamyz konferentsiiasynda bergen tapsyrmasynyń aiasynda tórt jyl ishinde muǵalimderdiń eńbekaqysy eki ese artady. Bul turǵydan aldaǵy qańtar aiynan bastap pedagogtardyń jalaqysy 25 paiyzǵa ósedi. Depýtattardyń qoldaýymen osy bekitilgen biýdjette tiisti qarajat qarastyrylǵan. Biz osy jumysqa qańtardan bastap kirisýge daiynbyz», - dedi Ashat Aimaǵambetov.
