Foto: Pexels
Pavlodar oblysynda zeinetker alaiaqqa aldanyp, 13 million teńgesinen aiyrylǵan, - dep habarlaidy "Ult aqparat" Polisia.kz saityna silteme jasap.
Elimizde eski shema boiynsha alaiaqtyq faktileri jiilep ketken. Solardyń biri – “Sizdiń ulyńyz, qyzyńyz nemese nemereńiz apatqa ushyrady, ia bolmasa politsiiada” degen habarlamalar. Telefon alaiaqtary ońai aldanatyn, týysqandarynyń amandyǵy úshin bárine daiyn qart adamdarǵa habarlasýdan bastaidy.
Máselen, 3 maýsymda tústen keiin belgisiz er adam 90 jastaǵy zeinetkerdiń qalalyq telefonyna qońyraý shalyp, "Qyzyńyz apatqa ushyrap, adamdy qaǵyp ketti. Qazir ártúrli jaraqattarmen aýrýhanada jatyr. Ony qylmystyq jaýapkershilikke tartpaý týraly máseleni sheshý úshin siz aqsha aýdarýyńyz kerek" degen syltaýmen habarlasqan. Alaiaqtar qarajatty Rýslan esimdi jigit alyp ketetinin aitqan. Biraz ýaqyttan keiin zeinetkerdiń úi telefonyna qobaljyǵan daýyspen "apatqa ushyradym, maǵan shuǵyl túrde 20 million teńge kóleminde aqsha kerek" degen qyzynyń daýysyna uqsas áiel habarlasady. Al zeinetker qońyraý shalǵan adamnyń daýysyn ajyrata almai, qyzynyń shynymen qiyn jaǵdaiǵa tap bolǵanyna senip qalady.
"Zeinetker jinaqtary men zeinetaqysynan 13 million teńge somasynda qarajat jinaǵan. Kóp uzamai olar esikti qaǵady, belgisiz adam kirip, ózin Rýslanmyn dep tanystyrǵan. Aqshany sanap, alyp ketedi.
Qazirgi ýaqytta belgisiz tulǵalardyń jeke basyn jáne ornalasqan jerin anyqtaýǵa jedel-izdestirý is-sharalary júrgizilip jatyr. Pavlodar oblysynyń jeke quramy baǵdarlanǵan", – dedi Pavlodar oblysy PD kriminaldyq politsiia bastyǵy Balǵabai Qaparov.
Jyl basynan beri jalpy 25 mln teńge qarajat bergen toǵyz pavlodarlyq osyndai shema boiynsha alaiaqtardyń "qarmaǵyna" túsken. Barlyq derek boiynsha Qazaqstan Respýblikasy QK-niń 190-baby boiynsha sotqa deiingi tergep-tekserý júrgiziledi.
