9-13 qańtar kúnderi Almatyda matematika, fizika jáne informatika pánderi boiynsha HVI Halyqaralyq Jáýtikov olimpiadasy ótti, dep habarlaidy pavlodarnews.kz.
Barlyǵy 21 elden 84 komanda jalpy sany 599 oqýshy báigege túsken bilim dodasynda Pavlodar qalasy himiia-biologiia baǵytyndaǵy Nazarbaev Ziiatkerlik mektebiniń 12 synyp oqýshysy Diiar Týlenov altyn medalǵa ie boldy. Olimpiadada Qazaqstan, Ázerbaijan, Armeniia, Belarýs, Bolgariia, Grýziia, Daniia, Qyrǵyzstan, Mońǵoliia, Nepal, Norvegiia, Birikken Arab Ámirlikteri, Resei, Rýmyniia, Serbiia, Tájikstan, Túrikmenstan, Túrkiia, Ózbekstan, Ýkraina jáne Shvetsiia elderiniń eń úzdik oqýshylary qatysqan bolatyn.
«Diiar shoqtyǵy biik halyqaralyq bilim dodalarynyń eń aýqymdysy sanalatyn Jáýtikov olimpiadasynda qatarynan úshinshi jyl altyn medalǵa ie bolyp otyr. Oqýshymnyń jetistigin óte joǵary baǵalaimyn. Qýanyshymda shek joq», - deidi 7-synyptan bastap olimpiadaǵa daiyndap kele jatqan fizika pániniń ustazy Nazymgúl Karimova.
Atap ótý kerek, Diiar osyǵan deiin Jáýtikov olimpiadasynda 2017 jyly qola medal, 2018, 2019 jyldary altyn medal iegeri atanǵan bolatyn. Ol tek mektep namysyn ǵana emes, respýblika atynan Halyqaralyq fizika olimpiadasynda, «Týimaada» halyqaralyq olimpiadasynda jáne basqa da halyqaralyq deńgeidegi bilim dodalarynda top jaryp, júldeli oryndardy ielendi.
«Olimpiada jyldaǵydai óte joǵary deńgeide ótti. Meniń bólimimde osy joly 170 oqýshy baq synasqan bolatyn. Osy oraida jyldar boiy bilimimdi ushtap, durys baǵyt-baǵdar bergen ustazym Nazymgúl Baritqyzyna, únemi qoldaý kórsetetin ata-anama, sondai-aq altyn uia – mektebime alǵysymdy bildiremin», - deidi jeńimpaz.
Osy jetistikteriniń nátijesinde búgingi tańnyń ózinde Diiar 3 ýniversitet - Reseidiń joǵary ekonomika mektebi, Nazarbaev Ýniversiteti jáne Qazaq-Britan ýniversitetiniń grantyna ie bolǵan. IELTS halyqaralyq emtihanynyń nátijesi boiynsha da joǵarǵy kórsetkishke qol jetkizip, 8,0 upai jinady. Diiar elimizdegi eń myqty 8 fiziktiń qataryna engen oqýshy.
