Pavlodarda úsh jigit Jastar úiiniń kámeletke tolmaǵan tárbielenýshisin zorlaǵan. Oqiǵadan keiin 16 jastaǵy qyz 10 qabatty úidiń terezesinen sekirip ketken. Pavlodarlyq qyz aǵashtarǵa qulap, tiri qalǵan. Qazir ol aýrýhanada jatyr, - dep habarlaidy Tengrinews.kz agenttigi.
Dina Tańsári oqiǵa týraly Facebook-paraqshasynda aityp berdi. Qoǵam belsendisiniń aitýynsha, oǵan jábirlenýshiniń ápkesi kómek surap júgingen, ekeýi de jetim.
"Sol kúni qyz týǵan kúndi toilap jatqan topta bolǵan. Keiin ózin jaisyz sezinip, ápkesine qaitýdy uiǵarǵan. Biraq qalany bilmei, adasyp qalǵan. Jolda úsh jigitti kezdestirip, olardyń biri ápkesiniń synyptasy bolyp shyqqan, ol qyzdy birge júrýge kóndirip, taksi shaqyryp, ony ápkesine jetkizýge ýáde bergen. Al, sodan keiingisi qorqynyshty tústei bolǵan. Ápkesi ony izdep qońyraý shalǵan, biraq telefondy jigitter óshirip qoiǵan. Boijetkendi aldap páterge kirgizip, zorlaǵan, ol shydai almai, 10 qabatty úidiń terezesinen sekirip ketken", - dep jazdy Tańsári.
Onyń aitýynsha, kámeletke tolmaǵan qyz uzaq ýaqyt jansaqtaý bóliminde bolǵan. Qazir ol palataǵa aýystyrylǵan.
"Onyń omyrtqasy synǵan, ishki aǵzalary zaqymdanǵan, saldarynan ishki organdarda qabyný protsesi bar, bul midaǵy protsesterge áser etedi - ol kórý jáne este saqtaý qabiletin tez joǵaltady. Qyzǵa tórt ota jasaldy, alda taǵy jasalady", - deidi qoǵam belsendisi.
Pavlodar oblystyq Politsiia departamenti baspasóz qyzmeti málimetinshe, qazirdiń ózinde zorlady degen kúdiktiler ustalǵan.
"Pavlodardaǵy kámeletke tolmaǵan qyzdy zorlaý isi oblystyq Politsiia departamenti basshylyǵynyń erekshe baqylaýynda. Kúdiktiler ustaldy. Kámeletke tolmaǵan balany zorlaý faktisi boiynsha QR QK-nyń 120-baby 3-1-bóligi "Kámeletke tolmaǵan adamǵa qatysty zorlaý", 121-baby 3-1-bóligi "Kámeletke tolmaǵan adamǵa qatysty seksýaldyq sipattaǵy zorlyq-zombylyq áreketteri" jáne 105-baby "Ózin-ózi óltirýge deiin jetkizý" boiynsha sotaldy tergep-tekserýler júrgizilip jatyr. Birqatar qajetti saraptama taǵaiyndaldy", - dep túsindirdi vedomstvonyń baspasóz qyzmeti ókilderi.
Aita keteiik, 120 jáne 121-baptardyń sanktsiiasynda belgili bir laýazymdardy atqarý nemese belgili bir qyzmetpen ainalysý quqyǵynan ómir boiyna aiyra otyryp, 15 jyldan 17 jylǵa deiin bas bostandyǵynan aiyrý kózdelgen.
