Pavlodarda zirat kúzetshisine jasalǵan shabýylǵa qatysty qylmystyq is qozǵaldy. Oqiǵa saldarynan aýyr jaraqat alǵan 66 jastaǵy er adam aýrýhanaǵa jetkizildi, dep habarlaidy ult.kz.
Aldyn ala málimet boiynsha, kámeletke tolmaǵan bir top jasóspirim zirat aýmaǵyna zańsyz kirgen. Olardy toqtatýǵa árekettengen kúzetshige shabýyl jasalyp, oǵan birneshe pyshaq jaraqaty salynǵan.
Pavlodar oblysy Politsiia departamentiniń málimetinshe, atalǵan derek boiynsha sotqa deiingi tergeý bastaldy.
– Atalǵan fakti boiynsha qylmystyq is tergelip jatyr. Iske qatysy bar barlyq tulǵalardyń jeke basy anyqtaldy. Qazirgi ýaqytta qajetti tergeý áreketteri júrgizilýde, – dep habarlady vedomstvonyń baspasóz qyzmeti.
Quqyq qorǵaý organdary oqiǵanyń barlyq mán-jaiyn anyqtap jatyr. Tergeý múddesine bailanysty ózge aqparat ázirge jariialanǵan joq.
Áleýmettik jelilerde jasóspirimderdiń ziratqa «árýaqtardy shaqyrý» maqsatynda barǵany týraly aqparat tarady. Alaida bul málimetke quqyq qorǵaý organdary ázirge resmi túsinikteme bergen joq.
