Pavlodarda sot ishimdik iship rólge otyrǵan áieldi kólik júrgizý quqyǵynan aiyrdy, biraq qamaýǵa almady, dep habarlady Sputnik oblystyq politsiia departamentiniń baspasóz qyzmetine silteme jasap.
Jeltoqsan túnderiniń birinde Estai kóshesinde patrýldik politseiler 38 jastaǵy áiel júrgizip kele jatqan Hyundai kóligin toqtatqan. Politsiianyń málimetinshe, odan alkogoldiń iisi shyqqan, soǵan bailanysty politseiler áieldi meditsinalyq aiǵaqtaý ornyna jetkizgen.
Ol jerde áiel júreginiń aýyryp turǵanyn aityp, jedel járdem shaqyrýdy ótingen. Shaqyrýǵa kelgen meditsina qyzmetkerleri ony teksergen soń, júreginde eshqandai syrqat bolmaǵandyqtan aýrýhanaǵa jatqyzýdan bas tartqan.
"Áieldiń jeńil dárejede mas ekeni anyqtalǵannan keiin ol taksige otyryp, qashyp ketpek boldy. Biraq ony politseiler ustady. Atalǵan fakti boiynsha Ákimshilik quqyq buzýshylyq týraly kodekstiń 608-baby boiynsha ákimshilik is qozǵaldy", - dedi jergilikti politsiia qyzmeti bastyǵynyń orynbasary Qýanysh Mustafinov.
Pavlodar qalasynyń ákimshilik quqyq buzýshylyq isteri jónindegi mamandandyrylǵan soty áieldi 7 jylǵa júrgizýshi kýáliginen aiyrdy. Biraq ol sotqa júktiligi týraly anyqtama bergendikten, ákimshilik qamaýǵa alynbady.
Biyl tártip saqshylary mas bolyp rólge otyrǵan 1462 júrgizýshini ustady, onyń 256-sy buryn júrgizýshi kýáliginen aiyrylyp, qaitadan kólik tizginine otyrǵan.
