Pavlodarda modýldik juqpaly aýrýlar gospitali paidalanýǵa berildi. Meditsinalyq mekemeniń ashylýyna oblys ákimi Ábilqaiyr Sqaqov qatysty, dep habarlaidy "Ult aqparat".
Aýdany 6800 sharshy metrdi quraityn gospital 200 tósek-orynǵa eseptelgen jáne 20 oryndyq reanimatsiia bólimshesinen, shaǵyn operatsiialyq bólmeden, PTR-taldaýlar júrgizýge arnalǵan zerthanadan, ekspress-zerthanadan, kompiýterlik tomografiia, rentgenografiia, ÝDZ, elektrokardiografiia jáne bronhoskopiia kabinetterinen turady. Statsionardyń modýldik bloktarynda jeke sanitarlyq toraptary bar palatalar ornalasqan.
«Bul óte qajet zamanaýi infektsiialyq aýrýhana qysqa merzimde salyndy. Ol sapaly meditsinalyq kómek kórsetý úshin jańa jabdyqtarmen, onyń ishinde kompiýterlik tomografpen, tsifrlyq rentgen-apparatpen, barlyq palatalarǵa ortalyqtandyrylǵan ottegi jetkizý júiesimen jáne ókpeni jasandy jeldetetin 24 apparatpen jabdyqtalǵan», - dedi Ǵ.Sultanov atyndaǵy oblystyq aýrýhananyń direktory Arman Musabekov.
Jańa aýrýhananyń qyzmetkerler quramy – tolyq. Munda jatatyn naýqastar sany 100 paiyz bolǵan jaǵdaida 88 tájiribeli dáriger men 240-qa jýyq orta jáne kishi býyn qyzmetkerleri jumys isteidi. Óńir basshysy bilikti maman bolmasa, tipti eń zamanaýi jabdyqtardyń da tiisti nátije bermeitinin eske salyp, pandemiiaǵa qarsy kúresip jatqan meditsina qyzmetkerlerine alǵysyn bildirdi.
«Densaýlyqqa qatysty kez kelgen jaǵdaiǵa árqashan joǵary jaýapkershilikpen qaraýymyz kerek. Qurylǵan infraqurylym qoiylǵan mindetterdi sheshýge múmkindik beredi dep oilaimyz. Árine, shamadan tys júkteme bolmaǵanyn, gospital múmkindiginshe az jumys istegenin qalaimyn. Men táýlik boiy birneshe aýysymda jumys istegen qurylysshylarǵa alǵys aitamyn. Densaýlyq pen sáttilik tileimin, ózderińizge, oblys turǵyndaryna qamqor bolyńyzdar», - dedi Ábilqaiyr Sqaqov.
Óńir basshysy oblystyń densaýlyq saqtaý júiesin nyǵaitý sharalary jalǵasa beretinin habarlady. Oblystyq jedel járdem stantsiiasy úshin jańa 109 reanimobil satyp alynýda. Ottegi stantsiialarynyń sanyn jyl basyndaǵy jaǵdaimen salystyrǵanda alty esege kóbeitý kózdelip otyr. Ókpeni jasandy jeldetý apparattarynyń sany eki ese ósti, qarashanyń ortasyna deiin ol úsh esege artady. Óńirde qosymsha eki PTR-zerthana iske qosyldy, jospar boiynsha taǵy eki zerthana ashý kózdelgen. Sonymen qatar 580 meditsina qyzmetkerinen turatyn kadrlyq rezerv quryldy.
