«Otandastar» qory men Pavlodar oblysynyń ákimdigi ózara yntymaqtastyq týraly memorandýmǵa qol qoidy, dep habarlaidy qordyń baspasóz qyzmeti.
Taraptar shetelde turatyn qandastardy jáne Atamekenge qonys aýdarǵan etnikalyq qazaqtardy qoldaý baǵytynda birlesip jumys atqarýǵa kelisti.
Eki jaqty kelisim qujatyna qol qoiý sharasyna «Otandastar» qorynyń aimaqtarmen jáne memlekettik organdarmen jumys jónindegi departamenttiń basqarýshy direktory Áliia Ábeldinova, oblys ákiminiń orynbasary Meiram Begentaev, oblystyq Ishki saiasat basqarmasynyń basshysy Ernur Dáýenov jáne Dúniejúzi qazaqtary qaýymdastyǵynyń Pavlodar oblystyq filialy tóraǵasy Bolat Zaýyt qatysty.
Óz sózinde «Otandastar» qorynyń Aimaqtarmen jáne memlekettik organdarmen jumys jónindegi departamentiniń basqarýshy direktory Áliia Ábeldinova Memleket basshysynyń tapsyrmasymen qurylǵan Qordyń maqsat-mindetteri jaily aityp, josparlarymen bólisti.
«Bizdiń otandastarymyzdyń kóbi Qazaqstanmen shekaralas aýmaqtarda turatynyn eskere otyryp, qazaq diasporasyn qoldaý maqsatynda Qor oblystyq ákimdiktermen tyǵyz yntymaqtastyq ornatyp otyr. Bul, óz kezeginde, erekshe mańyzǵa ie. Búginde «Otandastar» qory túrli baǵyttar boiynsha birqatar jobalardy júzege asyrýda. Olar bilim, sport, mádeniet, ana tilin úiretý, biznes-bastamalar jáne t.b. salalardy qamtidy. Sondai-aq, Qordyń basty mindetteriniń biri tarihi Otanyna oralǵan qandastardyń elde beiimdelýi barysynda olarǵa aqparattyq, uiymdastyrýshylyq jáne konsýltatsiialyq kómek kórsetip, olardyń jeke quqyqtary men zańdy múddelerin qoldaý bolyp tabylady», - dedi Áliia Sapabekqyzy.
Oblys ákiminiń orynbasary Meiram Begentaev óz sózinde «Otandastar qorymen» birlesip jumys jasaýǵa ázir ekenin jáne usynǵan barlyq jobalardy qoldaitynyn jetkizdi. Oblystyq ishki saiasat basqarmasynyń basshysy Ernur Dáýenov kóshi-qon salasynda buǵan deiin atqarylǵan jumystar týraly baiandap, aldaǵy josparlarymen bólisti. Aitýynsha, oblystyq «Ana tili» ortalyǵynda shetel qazaqtaryn oqytý kýrsy bastalady. Oǵan Reseidiń Novosibir, Omby jáne Altai ólkesiniń til mamandary shaqyrylǵan.
«Etnikalyq qazaqtardy qoldaý boiynsha birqatar jumys atqaryldy. Qazirgi kúni Resei jáne Mońǵoliia qazaqtarymen tyǵyz bailanysyp turamyz. Jaqynda Altai ólkesiniń qazaq aýyldarynyń kitaphanalaryna Pavlodar oblysy týraly 20 kitap berildi. Sondai-aq, birqatar ónerpazdarǵa sahnalyq kostiým tiktirip berdik. Ondaǵy qazaq diasporasy ókilderi ana tiderin umytpas úshin ádistemelik qoldaý kórsetilýde. Iaǵni, oblystyq tilderdi damytý basqarsynyń mamandary qazaq tili kýrstaryn ótkizip keldi», - dedi Ernur Nurlanuly.
Memorandým aiasynda taraptar Pavlodar oblysyna kelip qonystanǵan otandastardyń elde beiimdelýi men kirigýine jaǵdai jasaýǵa nietti. Bul, óz kezeginde, Etnikalyq qazaqtardy ýaqytsha ornalastyrý ortalyǵynyń negizinde júzege asyrylatyn bolady. Sondai-aq, Qor men Pavlodar oblysynyń ákimdigi osy Memorandýmnyń maqsattaryna sáikes keletin mádeni saýattylyqty arttyrý, bilim berý, sport, biznes jáne basqa da is-sharalarǵa jan-jaqty uiymdastyrýshylyq jáne tehnikalyq qoldaý kórsetedi.
Pavlodar oblysyna jumys sapary aiasynda «Otandastar» qorynyń ókilderi Etnikalyq qazaqtardy ýaqytsha ornalastyrý ortalyǵyna baryp, ondaǵy jaǵdaimen tanysyp qaitty.
