Foto: Freepik
Pavlodardaǵy №14 orta mektebiniń oqýshysy óz synyptasyn jáne muǵalimin pyshaqpen jaraqattaǵan. Zardap shekkender qazirgi kúni ambýlatoriialyq em qabyldap jatyr. Ómirlerine qaýip tónip turǵan joq, dep habarlaidy "Ult aqparat" Pavlodar oblysy politsiia departamentine silteme jasap.
- Pavlodar qalasynyń mektep oqýshysy ustaldy. Ol synyptasyna, sondai-aq muǵalimge pyshaq saldy. Atalǵan fakti boiynsha qylmystyq is qozǵaldy. Qazirgi ýaqytta qajetti tergeý áreketteri júrgizilip jatyr, - dedi oblystyq politsiia departamenti basshysynyń orynbasary Jasqairat Qaiyrov.
Tergeý múddesi úshin basqa aqparat jariia etilmedi.
Al Pavlodar oblysy densaýlyq saqtaý basqarmasynyń baspasóz qyzmeti zardap shekken áiel adam men kámelet jasyna jetpegen er bala qazirgi ýaqytta jergilikti aýrýhanalarda em qabyldap jatqanyn jetkizdi. Belgili bolǵandai, mektep muǵaliminiń iyǵy men keýdesi, oqýshynyń arqasy, jaýyryn bóligi jáne iyǵy jaraqattalǵan.
«Olardy travmatolog pen hirýrg qarap shyqty. Jaralaryn emdep, aseptikalyq tańǵyshtar qoiyldy. Naýqastardyń jalpy jaǵdaiy qanaǵattanarlyq, ambýlatoriialyq emdelýge jiberildi. Zardap shekkenderdiń ómirine qaýip joq», - dep málimdedi baspasóz qyzmetinen.
