Pavlodarda 500 mln teńgeni qolma-qol aqshaǵa ainaldyrǵan qylmystyq top ustaldy. Bul jaiynda QR Qarjylyq monitoring agenttiginen málim etti, dep habarlaidy "Ult aqparat".
Vedomstvo málimetinshe, Pavlodar oblystyq Ekonomikalyq tergep-tekserý departamenti is júzinde oryndalmaǵan jumystarǵa, kórsetilmegen qyzmetterge jáne jóneltilmegen taýarlarǵa jalǵan shot-faktýralardy jazyp berýmen ainalysqan uiymdasqan qylmystyq toptyń jolyn kesti.
Quramynda 11 múshesi bar top Pavlodar qalasynyń aýmaǵynda 4 jyl boiy josyqsyz salyq tóleýshilerge salyq tóleýden jaltarýǵa kómektesip kelgen.
«Top músheleri baqylaýdaǵy 20 firma arqyly jalǵan býhgalterlik qujattardy jazyp berýmen ainalysqan. Memleketke atalǵan toptyń zańǵa qaishy áreketinen 500 mln teńgeden astam somaǵa tólenbegen salyqtar túrinde zalal keltirildi. Kináli tulǵalar 1,5 jyldan 6,5 jylǵa deiingi merzimge sottaldy. Memleket kirisine 4 páter jáne 3 avtokólik tárkilendi», - dep atap ótedi agenttikten.
