Pavlodar qalasynda jańa qazaq tildi mektep-litseii boi kóterdi. Qazir oqýshylar qabyldanyp jatyr. Jańa oqý jylynan bastap esigi aiqara ashylady. Bul týraly keshe, oblys ákimi Ábilqaiyr Sqaqov respýblikalyq BAQ ókilderine arnalǵan brifingi barysynda málim etti.
Ertis-Baian óńirinde jyl sanap qazaq tildi mektepterge degen suranys artyp keledi. Resmi statistikaǵa júginsek, búginde oblys boiynsha barlyǵy 359 mektep bolsa, onyń 138-i, iaǵni 39%-ynyń oqytý tili – qazaq tili. Sońǵy bes jylda memlekettik tilde bilim beretin mektepterdiń qatary artqan. Sonyń ishinde tórt aralas mektep tolyǵymen qazaq tiline aýysty.
Endi mine, bul tizim taǵy bir sý jańa bilim ordasymen tolyqpaq. Pavlodar qalasynda jańadan salynǵan «Saryarqa» shaǵyn aýdanynda oryn tepken mektep tusaýy biyl kúzde kesiletin boldy. Bul oblys ortalyǵyndaǵy litsei dárejesi bar alǵashqy qazaq tildi mektep bolmaq.
«Mektep qurylysy tolyǵymen aiaqtaldy. Munda bir aýysymda 650 oqýshy bilim alatyn bolady. Nysan aldaǵy jańa oqý jylynan bastap resmi túrde jumysyn bastaidy. Qazir oqýshylardy tirkeý boiynsha tiisti ótinishter qabyldanýda. Áleýmettik, bilim salasyna jaýapty mamandar tiisti taldaý júrgizdi. Suranysqa orai bul mektepte memlekettik tilde bilim berýletin bolady», - dedi aimaq basshysy Á.Sqaqov respýblikalyq ortalyq kommýnikatsiialar qyzmetinde sóilegen sózinde.
Qazaq tildi mektepterge degen suranystyń artqanyn Pavlodar oblysynyń bilim berý basqarmasyndaǵylar keltirgen myna bir mysaldan aiqyn baiqaýǵa bolady. Pavlodar qalasynda Baýyrjan Momyshuly atyndaǵy bilim ordasynda 700-ge jýyq oqýshy artyq oqidy. Iaǵni, júkteme tym joǵary. Mekteptiń úsh aýysymǵa ótý qaýpi týyndaýda. Bul ondaǵy bilim sapasyna, sanitarlyq jaǵdaiǵa keri áserin tigizeri sózsiz. Sondyqtan atalǵan bilim berý ordasynyń biraz oqýshylary ata-analardyń kelisimi boiynsha «Saryarqa» shaǵyn aýdanyndaǵy jańadan boi kótergen litsei-mektebine aýystyrylmaq. Bul eki mektep bir-birine jaqyn ornalastyrylǵan.
Aita keteiik, Pavlodar oblysynda taza orys tilinde bilim beretin 52 mektep bar. Sońǵy 4 jylda orys tildi 23 bilim berý mekemesinde qazaq tilinde oqytatyn birinshi synyptar ashylǵan. Bul baǵyttaǵy jumystar aldaǵy ýaqytta da júrgizilmek.
