Sottalýshylar jappai tártipsizdikterge qatysty, belsendi túrde shaqyrdy, bilik ókilderine baǵynbady, al qatysýshylardyń birine politsiia qyzmetkerine kúsh qoldandy degen aiyp taǵyldy.
Sot altaýynyń bárine qatysty aiyptaý úkimin shyǵardy. Negizgi aiyptalýshy jappai tártipsizdikti uiymdastyrdy, bilik ókilderine baǵynbaýǵa shaqyrdy dep aiyptalyp, jazasyn 6 jylǵa qatań rejimdegi koloniiada óteýge sottaldy. Buǵan deiin er adam aýyr qylmys jasaǵany úshin sotty bolyp, kinásin tolyq ótemegen. Onyń áreketin sot retsediv dep anyqtady.
"Sottalǵan K. 2020 jylǵy 5 qańtarda Pavlodar oblysy ákimdigi ǵimaratynyń aldynda qoǵamdyq qaýipsizdikke qarsy jappai tártipsizdikter uiymdastyryp, D. jáne B-men birlesip, búlik shyǵaryp, múliktiń joiylýyna jáne politsiia qyzmetkerine zorlyq-zombylyq kórsetýge ákelgen zańsyz mitingige qatysýǵa shaqyrdy", - dep túsindirdi Pavlodardyń №2 sotynyń sýdiasy Qýanysh Tólebaev sot úkimi jariialanǵannan keiin.
Ekinshi sottalýshy 4 jyl jazasyn ortasha rejimdegi koloniiada óteidi. Onyń telefonynan ákimdik ǵimaratyna kirip, "ákimdikti basyp aldyq" dep pikir bildirgen video tabylǵan.
Taǵy úsh aiyptalýshy úsh jylǵa shartty túrde bas bostandyǵynan aiyryldy, keiingi sottalýshy bir jarym jylǵa bas bostandyǵyn shekteý jazasyn aldy. Sottalǵandarǵa probatsiialyq baqylaý belgilenedi, sonymen qatar, olarǵa oiyn-saýyq mekemelerine barýǵa, ruqsatsyz oblystan tys jerlerge shyǵýǵa, turǵylyqty jerin jáne jumysyn ózgertýge tyiym salynady.
Sot jaza taǵaiyndaý kezinde jaýaptylyqty aýyrlatatyn jáne jeńildetetin mán-jailardyń joqtyǵyn, atap aitqanda, sottylyǵynyń bolmaýyn, kinásin tolyq moiyndaýyn, ókinýin jáne tergeýge belsendi túrde atsalysýyn eskerdi.
Sot Pavlodar oblysy ákimi apparatynyń jáne tártipsizdik saldarynan zardap shekken eki qalalyq avtobýs ieleriniń azamattyq talaptaryn qanaǵattandyrdy. Sot sottalǵandarǵa birlesip, memlekettik mekemege 2,1 million teńge materialdyq shyǵyndy, sondai-aq, avtobýstardyń ielerine 456 jáne 227 myń teńgeni tóleýge mindettedi.
