Foto: almatysite.kz
Pavlodar oblysynda bilim berý salasyna qatysty 2 myńnan astam qyzmetkerdiń jeke derekteri ashyq derekkózderde jariialanyp ketken. Oblystyq prokýratýra bul zańbuzýshylyqty anyqtap, derekterdiń taralýyna tosqaýyl qoidy, dep habarlaidy Ult.kz.
Memlekettik satyp alý portalynda oblys ortalyǵyndaǵy birqatar mektepterdiń meditsinalyq tekserý qyzmetterin satyp alýǵa bailanysty habarlandyrýlar ornalastyrylǵan. Alaida 28 bilim berý uiymy konkýrs qujattamasyna óz qyzmetkerleriniń saýalnamalyq málimetterin, turǵylyqty mekenjailaryn jáne bailanys nómirlerin engizip jibergen.
Mamandardyń aitýynsha, jeke derekterdiń ashyq qoljetimdi bolýy eńbek zańnamasyn buzýmen qatar, alaiaqtyq áreketterge jol ashýy múmkin.
Prokýratýranyń qadaǵalaý aktisinen keiin 2 065 qyzmetkerdiń derekteri ashyq resýrstardan joiyldy. Sonymen qatar, zańbuzýshylyqqa jol bergen jaýapty tulǵalar tártiptik jaýapkershilikke tartyldy.
Qadaǵalaý organynyń málimetinshe, qabyldanǵan sharalar zańdylyqty qalpyna keltirýge jáne azamattardyń quqyqtaryn qorǵaýǵa múmkindik bergen.
