Pavlodarda balabaqsha qyzmetkeri balany tósekke jatpaǵany úshin soqqyǵa jyqqan. Oqiǵa mektepke deiingi mekemede ornatylǵan beinebaqylaý kameralaryna túsip qalǵan. Qyzmetker jumystan bosatylyp, oǵan qatysty materialdar quqyq qorǵaý organdaryna jiberildi, - dep habarlaidy Massaget.kz.
Kadrlarda balabaqsha qyzmetkeri kishkentai qyzdy ustap alyp, qalai tósekke kúshtep jatqyzǵany, keiin ústin jaýyp, qolymen birneshe ret urǵany kórsetilgen.
Qalalyq bilim bólimi málimetinshe, oqiǵa Pavlodardaǵy №4 balabaqshada bolǵan. Balanyń anasy mektepke deiingi mekeme ákimshiligine qyzynyń aiaǵyndaǵy kógergen jerine shaǵymdanǵan.
"Beinebaqylaý kamerasyn tekserý kezinde tárbielenýshi kereýettiń shetine ózi soǵylǵany anyqtaldy. Alaida kameralardan jazbalardy odan ári qaraǵan kezde tárbieshi kómekshisi "B" kishi tobynyń tárbielenýshisin urǵany anyqtaldy. Bul jaǵdai 9 tamyzda uiyqtaityn bólmede balalardy kúndizgi uiqyǵa jatqyzý kezinde bolǵan", - dep túsindirdi Pavlodar Bilim berý bólimi ókili.
Vedomstvo málimetinshe, mektepke deiingi uiym basshysynyń mindetin atqarýshy jáne kishi top tárbieshisiniń kómekshisinen túsinikteme alynǵan.
"Jumys berýshiniń bastamasymen kishi top tárbieshisi kómekshisiniń eńbeksharty buzyldy. Durys baqylamaǵany úshin mekeme basshysynyń mindetin atqarýshyǵa sógis túrinde tártiptik jazalaý sharalary qabyldandy", - dep atap ótti Pavlodar qalasynyń bilim berý bólimi qyzmetkeri.
Barlyq material quqyq qorǵaý organdaryna jiberilgen.
