Biýdjetten 40 mln teńge jymqyrdy dep aiyptalǵan Pavodar qalasyndaǵy «Shańyraq» halyq shyǵarmashylyǵy jáne mádeni-demalys qyzmeti ortalyǵynyń basshysy sottaldy, dep habarlaidy QazAqparat.
Bul týraly QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Qaisar Barjaqsynov Antikor aqparat alańynda málim etti.
«21 qyrkúiekte Pavlodar qalasynyń №2 sotynyń úkimimen oblystyq «Shańyraq» halyq shyǵarmashylyǵy jáne mádeni-demalys qyzmeti ortalyǵynyń basshysy Aiapbergenova 7 jylǵa bas bostandyǵynan aiyryldy» dedi agenttik tergeýshisi.
Osy úkimmen «Shańyraq» ortalyǵynyń kassiri Ábishaeva da 7 jyl merzimge bas bostandyǵynan aiyrylypty.
«Atalǵan tulǵalar ártisterdiń qyzmetter kórsetýi týraly kórineý jalǵan sharttar jasaý arqyly 2017 jyldan bastap 2019 jylǵa deiingi kezeńde 40 mln teńge somasynda biýdjet qarajatyn jymqyrdy dep kúdiktengen. Aiapbergenova ómir boiy memlekettik qyzmette qyzmet atqarý quqyǵynan aiyryldy, Ábishaeva materialdyq jaýapkershilikke bailanysty qyzmetpen 10 jyl merzimge ainalysý quqyǵynan aiyryldy. Úkim zańdy kúshine engen joq», - dedi QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Qaisar Barjaqsynov.
