Óńirlik kommýnikatsiialar qyzmetinde ótken «Tilderdi qoldaný men damytýdyń Memlekettik baǵdarlamasyn Pavlodar oblysynda júzege asyrý týraly» baspasóz máslihatynda osy másele aityldy. Bul týraly pavlodarnews.kz saity habarlaidy.
Oblystyq tilderdi damytý basqarmasynyń basshysy Sáýle Osmanova aitqandai, joǵaryda atalǵan memlekettik baǵdarlamanyń úlken bir bóligi onomastika máselesine qatysty.
«Bul másele elimizdiń basqa óńirlerine qaraǵanda bizdiń aimaqta kúrdeli. Ońtústik oblystarda, Mańǵystaýda eldi mekender men kóshelerdiń 90 paiyzy qazaq tilinde. Tek qana Pavlodar qalasyn alsaq, 333 kósheniń 22 paiyzy qazaqsha, qalǵan 78 paiyzy – orys tilinde bolyp tur», - dep atady Sáýle Osmanova.
Sáýle Osmanovanyń aitýynsha, bul baǵyttaǵy jumys júrgizilip jatyr. Byltyr oblys boiynsha 189 kósheni qaita ataldy. Biyl 70 kóshe men eki aýdannyń ataýy qazaqshaǵa ózgertildi.
«Lebiaji aýdanyn Aqqýly dep, Kachir aýdanyn – Tereńkól dep ózgerttik. Onymen birge, qalamyzda 99 jyl boiy «Lenin» bolyp atalyp kelgen kósheni Astana dep qaita atadyq. Onyń ózi úlken jetistik dep oilaimyn. Jýyrda taǵy eki kósheniń atyn ózgertý týraly máseleni oblystyq máslihat depýtattarynyń qaraýyna usynamyz. Osymen biylǵy onomastikalyq jumys aiaqtalady», - deidi Sáýle Osmanova.
Oblystyq tilderdi damytý basqarmasynyń basshysy qazaq álipbiiniń latyn grafikasyna kóshirilý jaiyna da keńinen toqtaldy. Sáýle Osmanova aitýynsha, biylǵy jyldan basqarma osy baǵyttaǵy jumysty bastap ketti.
«QR Mádeniet ministriliginiń tapsyrmasymen 9 qarashaǵa deiin nasihat jumysyn júrgizý boiynsha oblysta quramy 15 adamnan turatyn úsh jumys toby aýdandardy aralap, latyn grafikasyndaǵy qazaq álipbiin nasihattap júr. Jalpy halyq qoldap otyr. Qarsylyq joq», - deidi Sáýle Osmanova.
Oǵan qosa, 14 qarashada saǵat 11.00-de elimizde bir ýaqytta latyn álipbiindegi Jalpyhalyqtyq diktant ótkiziledi. Oǵan 16 jastan úlken azamattardyń barlyǵy qatysa alady. Oblys boiynsha diktantqa 80 myń adam qatysady dep kútilýde. Baqylaý sabaǵy qalamyzdaǵy úsh ýniversitet pen «Dostyq úiinde» ótetin bolady. Diktant mátini jaqynda belgili bolady.
