Pavlodarda 13 jastaǵy jasóspirim balalarǵa kún kórsetpei júr. Bul týraly balasy zábir kórgen ata-analardyń biri áleýmettik jelidegi paraqshaǵa hat jazǵan, - dep habarlaidy Pavlodarnews.kz.
Turǵynnyń aitýynsha, alty jastaǵy balasy zábir kórgen. Jasóspirim onyń basynan taspen urǵan.
"Buǵan deiin de birneshe ret renjitken. Bul joly alty jastaǵy balamdy shekesinen taspen urǵan. Al maǵan aitatyn bolsa, moinyn územin degen. Onyń ata-anasyna sóilesýge barǵan edim. Biraq "shaǵym jaza ber, báribir eshteńe istei almaidy" degen jaýap aldym. Jedel járdem men politsiia shaqyrdyq. Dárigerler "jabyq bas súiek-mi jaraqaty, bas miynyń shaiqalýy, bas aimaǵynyń kógerýi" diagnozyn qoidy, - deidi hattyń avtory.
Onyń aitýynsha, kámeletke tolmaǵandardyń isi jónindegi inspektor kelip, buzaqylyq tanytqan balanyń úiinde bolǵan, biraq zardap shegýshi taraptan, kýágerlerden jaýap almaǵan. Sot-meditsinalyq saraptamasyna bara jatqan kezde isti jaýyp tastaǵan.
Oblystyq Politsiia departamenti málimetinshe, derek Pavlodar qalasynyń soltústik politsiia bóliminde tirkelgen jáne tekserý júrgizilip jatyr.
"Janjalǵa qatysýshylar anyqtaldy. Kámeletke tolmaǵan bala qylmystyq jaýapkershilik týyndaityn jasqa jetpegenin eskere otyryp, sotaldy tergeý toqtatyldy. Sonymen qatar, minez-qulqy kámeletke tolmaǵandardyń isteri jáne olardyń quqyqtaryn qorǵaý jónindegi komissiiada qaralady, balamen jáne onyń ata-anasymen osyndai faktilerge jol bermeý týraly profilaktikalyq áńgime ótkiziledi. Sondai-aq, zardap shekken balanyń anasy materialdyq zalaldy óteý úshin azamattyq tártippen sotqa júginýge quqyly", - deidi politsiia ókilderi.
Degenmen basqa da zardap shekken balalardyń ata-analary jazasyz qalǵan jasóspirim budan keiin de buzaqy áreketterin qaitalai ma dep qorqady.
