Pavlodar oblysynda er adam órtenip jatqan kólikten tórt adamdy qutqardy, sodan keiin kólik jarylyp ketti, - dep habarlaidy Tengrinews.kz.
Maraldy aýylynyń 42 jastaǵy turǵyny Erkebulan Júzbaev jarylys qaýpine qaramastan, órtenip jatqan kólikke qarai umtylyp, eki jábirlenýshini shyǵarǵan, al kýágerlerdiń biri oǵan taǵy ekeýin qutqarýǵa kómektesken.
Qazir zardap shekkender aýrýhanada jatyr. Tórt adamnyń bireýi komada, ekeýi aýyr halde. Oqiǵa 26 tamyzda Pavlodar - Sharbaqty tasjolyndaǵy Maraldy aýylynyń mańynda bolǵan. Kýágerlerdiń aitýynsha, kólik KamAZ tirkemesimen soqtyǵysyp, birden otqa oranǵan.
Jelide taraǵan kadrlarda otqa oranǵan kólik, odan birneshe metr jerde shópte jatqan adamdar, zardap shekkenderge kómektesip jatqan jedel járdem qyzmetkerleri kórinedi.
Kýágerler video Erkebulan órtenip jatqan kólikten adamdardy alyp shyqqannan keiin túsirilgenin aitady. Qutqarý sáti videoǵa túspei qalypty.
Tengrinews.kz tilshisi keiipkermen tildesti. Er adam Maraldy stantsiiasynda temirjolshy bolyp jumys isteidi eken.
"Sol kúni keshke jumystan qaityp kele jatyp tasjoldaǵy jol apatyn kórdim. Joldyń shetinde KamAZ turdy, sál ary qarai Audi órtenip jatty. Men birden janyp jatqan kólikke júgirdim. Ishinde adamdar boldy. Jaqyn mańda biraz adamdar turdy, biraq olar kólik jarylyp kete me dep qorqyp jaqyndamady. Men de qatty qorqyp tursam da, qutqarý kerek dep aiqailadym. Kólik kez kelgen ýaqytta jarylyp ketýi múmkin ekenin bildim.
Esikti tartyp ashyp bireýin shyǵaryp, súirep shópke alyp bardym. Osylai ekinshisine júgirdim, bul kezde jalyn odan da ulǵaia tústi. Júrgizýshilerge júgirip baryp, órt sóndirgish suradym. Biraq eshkimde órt sóndirgish bolmady. Bireý maǵan kishkentaiyn berdi, men janyp jatqan kólikke qaita júgirdim, órt odan saiyn kúsheidi, órt sóndirgish kómektespedi, men ekinshi jolaýshyny shyǵara bastadym. Sosyn taǵy bir adam eki adamdy alyp shyǵýǵa kómektesti. Sońǵy jolaýshyny qutqarǵannan keiin, bir minýttai ýaqyt ótti, jarylys boldy", - deidi Júzbaev.
