پاۆلودار وبلىسىندا ەر ادام ٶرتەنٸپ جاتقان كٶلٸكتەن تٶرت ادامدى قۇتقاردى, سودان كەيٸن كٶلٸك جارىلىپ كەتتٸ, - دەپ حابارلايدى Tengrinews.kz.
مارالدى اۋىلىنىڭ 42 جاستاعى تۇرعىنى ەركەبۇلان جٷزباەۆ جارىلىس قاۋپٸنە قاراماستان, ٶرتەنٸپ جاتقان كٶلٸككە قاراي ۇمتىلىپ, ەكٸ جەبٸرلەنۋشٸنٸ شىعارعان, ال كۋەگەرلەردٸڭ بٸرٸ وعان تاعى ەكەۋٸن قۇتقارۋعا كٶمەكتەسكەن.
قازٸر زارداپ شەككەندەر اۋرۋحانادا جاتىر. تٶرت ادامنىڭ بٸرەۋٸ كومادا, ەكەۋٸ اۋىر حالدە. وقيعا 26 تامىزدا پاۆلودار - شارباقتى تاسجولىنداعى مارالدى اۋىلىنىڭ ماڭىندا بولعان. كۋەگەرلەردٸڭ ايتۋىنشا, كٶلٸك كاماز تٸركەمەسٸمەن سوقتىعىسىپ, بٸردەن وتقا ورانعان.
جەلٸدە تاراعان كادرلاردا وتقا ورانعان كٶلٸك, ودان بٸرنەشە مەتر جەردە شٶپتە جاتقان ادامدار, زارداپ شەككەندەرگە كٶمەكتەسٸپ جاتقان جەدەل جەردەم قىزمەتكەرلەرٸ كٶرٸنەدٸ.
كۋەگەرلەر ۆيدەو ەركەبۇلان ٶرتەنٸپ جاتقان كٶلٸكتەن ادامداردى الىپ شىققاننان كەيٸن تٷسٸرٸلگەنٸن ايتادى. قۇتقارۋ سەتٸ ۆيدەوعا تٷسپەي قالىپتى.
Tengrinews.kz تٸلشٸسٸ كەيٸپكەرمەن تٸلدەستٸ. ەر ادام مارالدى ستانتسيياسىندا تەمٸرجولشى بولىپ جۇمىس ٸستەيدٸ ەكەن.
"سول كٷنٸ كەشكە جۇمىستان قايتىپ كەلە جاتىپ تاسجولداعى جول اپاتىن كٶردٸم. جولدىڭ شەتٸندە كاماز تۇردى, سەل ارى قاراي Audi ٶرتەنٸپ جاتتى. مەن بٸردەن جانىپ جاتقان كٶلٸككە جٷگٸردٸم. ٸشٸندە ادامدار بولدى. جاقىن ماڭدا بٸراز ادامدار تۇردى, بٸراق ولار كٶلٸك جارىلىپ كەتە مە دەپ قورقىپ جاقىندامادى. مەن دە قاتتى قورقىپ تۇرسام دا, قۇتقارۋ كەرەك دەپ ايقايلادىم. كٶلٸك كەز كەلگەن ۋاقىتتا جارىلىپ كەتۋٸ مٷمكٸن ەكەنٸن بٸلدٸم.
ەسٸكتٸ تارتىپ اشىپ بٸرەۋٸن شىعارىپ, سٷيرەپ شٶپكە الىپ باردىم. وسىلاي ەكٸنشٸسٸنە جٷگٸردٸم, بۇل كەزدە جالىن ودان دا ۇلعايا تٷستٸ. جٷرگٸزۋشٸلەرگە جٷگٸرٸپ بارىپ, ٶرت سٶندٸرگٸش سۇرادىم. بٸراق ەشكٸمدە ٶرت سٶندٸرگٸش بولمادى. بٸرەۋ ماعان كٸشكەنتايىن بەردٸ, مەن جانىپ جاتقان كٶلٸككە قايتا جٷگٸردٸم, ٶرت ودان سايىن كٷشەيدٸ, ٶرت سٶندٸرگٸش كٶمەكتەسپەدٸ, مەن ەكٸنشٸ جولاۋشىنى شىعارا باستادىم. سوسىن تاعى بٸر ادام ەكٸ ادامدى الىپ شىعۋعا كٶمەكتەستٸ. سوڭعى جولاۋشىنى قۇتقارعاننان كەيٸن, بٸر مينۋتتاي ۋاقىت ٶتتٸ, جارىلىس بولدى", - دەيدٸ جٷزباەۆ.
