Memlekettik tildi bala kezinen jetik biletin Natalia Saharova qazaqtyń salt-dástúrin de jaqsy biledi, dep habarlaidy "Ult aqparat" Pavlodarnews.kz saityna silteme jasap.
- Men Baianaýyl aýdany Birlik aýylynda óstim. Bala kezimnen qazaq tilin bilemin. Otbasymyzda 5 qyz. Barlyǵymyz qazaqsha sóilesemiz. Ultym orys bolsa da óz elimniń tilin, dinin, saltyn qurmetteimin. Qazaq halqy qonaqjailylyǵymen tanylǵan. Biz de sodan qalys qalmaimyz. Kez kelgen merekede qonaq shaqyryp, et asyp, baýyrsaq pisiremiz. Naýryz kójeni de jyl saiyn daiyndaimyn, - deidi Natalia Saharova.
Natalia Saharova Damir esimdi ulyn tárbielep otyr. Uly da qazaq tilin meńgerip keledi. Natalianyń aitýynsha, qazaq tilin ońai úirený úshin tildi biletin adamdarmen aralasý kerek.
- Men ózim 7 jasymnan qazaq tilinde sóilep kele jatyrmyn. Mektepti qazaqsha oqyp, bitirdim. Qazaq balalarmen aralasqannyń, jii sóileskenniń arqasynda tildi jeńil meńgerdim dep oilaimyn, - dedi Natalia Saharova.
Natalianyń mamandyǵy erekshe. Ol KSP Steel kompaniiasynda kran mashinisi bolyp jumys jasaidy. Bul salada qyzmet atqaryp kele jatqanyna 4 jyl bolǵan.
- Óndiriste jumys jasaý bas kezinde qiyn bolǵanmen, keiin mashyqtanyp, úirenip ketesiń. Jumys aýyr emes. Oqyp, úirenip aldym. Bul mamandyqty ápke-sińlilerime aitqan kezde olar qarsy boldy. Meniń dostarym, synyptastarym áli tań qalady. Kran mashinisi bolyp jumys jasaimyn desem, keibiri qaljyńdap otyr dep oilaidy, - deidi Natalia Saharova.
Keiipkerimiz jumystyń aq-qarasy bolmaitynyn aitady. Bastysy, adal eńbek atqarý. Óndiristik oryndarda názik jandylar atqaratyn jumys kóp. Natalia óziniń qyzy bolsa, óndiristik orynda jumys jasaýyna qarsy bolmaitynyn aitady.
