Sot Bolat Baqaýovty bos bostandyǵynan aiyrǵan joq, dep habarlaidy "Ult aqparat".
Pavlodardyń №2 soty Nurlan Qaiyrbekovtyń tóraǵalyǵymen Bolat Baqaýovqa qatysty qylmystyq isti kelistirýshi óndiriste qarastyryp, aiyptalýshyny QR QK 361-baby, 4-bóligi, 3-tarmaǵymen qarastyrylǵan qylmys jasaýǵa kináli dep tanyp, oǵan probatsiialyq baqylaýmen úsh jyl jáne alty ai bas bostandyǵyn shekteý, ómir boiy memlekettik qyzmette laýazymdyq oryndarǵa ie bolý quqyǵynan aiyrý jazasyn taǵaiyndady.
Bolat Baqaýovtyń qylmystyq jolmen nemese qylmystyq jolmen iemdengen qarajatqa satyp alǵan múlkiniń joqtyǵyna bailanysty oǵan múlkin tárkileý qosymsha jazasy taǵaiyndalǵan joq. QR Joǵarǵy sotynyń 7.07.2016 jylǵy №4 Normativtik qaýlysynyń 14-tarmaǵyna sáikes, protsessýaldyq kelisimge kelý úshin kúdiktiniń kinásin moiyndaýy mindet emes. Onyń kúdik pen iske qatysty aiǵaqtardy joqqa shyǵarmaǵany jetkilikti. «Úi qamaǵy» bultartpaý sharasy alynyp tastaldy.
Oǵan deiin Bolat Baqaýovqa QR QK 362-baby, 4-bóliminiń, 3-tarmaǵyna sáikes aiyp taǵylǵan edi (bilikti nemese laýazymdyq ókilettikterdi asyra paidalanýdy, laýazymdy adam bola tura, óziniń quqyqtary men ókilettikteriniń sheginen anyq shyǵatyn jáne memlekettiń zańmen qorǵalatyn múddelerine eleýli ziian keltirýdi, basqa adamdarǵa paida men artyqshylyqtar alý jáne uiymdarǵa ziian keltirý maqsatynda jasalǵan is-áreketter).
Oǵan bailanysty múlikti tárkileýmen birge bes jyldan on jylǵa deiin bas bostandyǵynan aiyrý sanktsiialary kózdelgen bolatyn.
Esterińizge sala ketsek, osy jyldyń 16 qańtarynda QR Ulttyq qaýipsizdik komiteti Pavlodar oblysynyń ákimi Bolat Baqaýovqa qatysty qylmystyq isti tergep jatqany belgili bolǵan edi.
«Ulttyq qaýipsizdik komiteti 2020 jylǵy 15 qańtarda Pavlodar oblysynyń ákimi Bolat Baqaýovqa qatysty laýazymdyq ýákilettigin asyra paidalaný faktisi boiynsha QR QK-niń 362-baby 2-bóligi 3-tarmaǵy boiynsha tirkelgen qylmystyq iske sáikes jedel-tergeý sharalaryn júrgizdi. Qazirgi ýaqytta tergeý amaldary jalǵasýda. Osy kezeńde tergeý múddesine orai tolyq derekter jariialanýǵa jatpaidy», - delingen UQK aqparatynda.
Bolat Baqaýov 18 aqpannan beri úiqamaqta otyr.
Sáýirde ony úiqamaqta ustaý merzimi mamyr aiyna deiin sozyldy.
