Ekibastuz ákiminiń orynbasary men ákimdik bóliminiń taǵy eki qyzmetkeri ustaldy. Ekibastuz qalasy ákiminiń baspasóz qyzmeti málimetinshe, úsh qyzmetker de aiǵaq berý úshin ustalǵan, - dep habarlaidy Tengrinews.kz.
Ekibastuz ákiminiń orynbasary men onyń qolastyndaǵy eki qyzmetkeri ustalǵany týraly habarlama áleýmettik jelilerde paida boldy. Qala ákiminiń baspasóz qyzmeti aqparatty rastady.
"Qala ákiminiń orynbasary Baýyrjan Ahmetov, turǵyn úi-kommýnaldyq sharýashylyq bólimi basshysynyń orynbasary jáne osy bólimniń statistika mamany kýálik berý úshin ustaldy. Olardy 29 qyrkúiekte saǵat 16.00 shamasynda Sybailas jemqorlyqqa qarsy qyzmet ustady. Bizde basqa aqparat joq", - dep túsindirdi Ekibastuz ákiminiń baspasóz qyzmeti ókilderi.
Sondai-aq, olar Ahmetov pen onyń qolastyndaǵylar óz qyzmetinen shettetilmegenin qosty.
"Olardy jumystan eshkim shettetken joq, olardy ne úshin ustaǵanyn jáne budan ári qandai is-sharalar ótkiziletinin bilmeimiz. Tiisinshe, qala ákiminiń orynbasary men TKSh bóliminiń qyzmetkerlerine qatysty eshqandai áreket jasai almaimyz", - dedi Ekibastuz qalasy ákiminiń baspasóz qyzmeti ókilderi.
Aita keteiik, 36 jastaǵy Baýyrjan Ahmetov byltyr qańtarda Ekibastuz qalasy ákiminiń orynbasary qyzmetine taǵaiyndalǵan. Sondai-aq, ol kommýnaldyq sala máselelerine jetekshilik etedi. Taǵaiyndalǵanǵa deiin QR Ulttyq ekonomika ministrligi Memlekettik materialdyq rezervter komitetiniń jumyldyrý rezervin esepke alý jáne baqylaý basqarmasynyń basshysy qyzmetin atqarǵan.
