Pavlodar oblysynyń Sharbaqty aýdanyndaǵy Novyi Zavod aýyly turǵyndary masalardyń jappai kóbeiýine shaǵymdandy. Áleýmettik jelilerde taraǵan videolarda aýyldy qaptaǵan jándikterdiń úlken úiirleri kórsetilgen, dep habarlaidy ult.kz.
Jergilikti turǵyndardyń aitýynsha, kóshede júrý múmkin bolmai qalǵan. Qansorǵysh jándikterden balalar, úi janýarlary men mal sharýashylyǵymen ainalysatyn aýyl turǵyndary zardap shegip otyr. Kópshilik qajettilik bolmasa, syrtqa shyqpaýǵa tyrysatynyn aitady.
Shaǵymdardan keiin aýylǵa oblystyq jer qoinaýyn paidalaný, qorshaǵan orta jáne sý resýrstary basqarmasynyń mamandary, aýdan ákimdigi ókilderi men ǵylymi top barǵan. Tekserý barysynda masalardyń jappai kóbeiý deregi rastaldy.
Mamandardyń aldyn ala boljamynsha, jaǵdai orman órtterin sóndirý kezinde sý alý úshin jasalǵan jasandy sý qoimalary men eldi mekender mańyndaǵy shaǵyn sý aidyndarynyń áserinen týyndaǵan bolýy múmkin.
10 maýsymnan bastap aýyldarda eresek masalarǵa qarsy dezinsektsiialyq óńdeý jumystary bastaldy. Bul úshin arnaiy búrikkish qurylǵylar men ystyq tuman generatorlary qoldanylyp jatyr.
Sonymen qatar sý aidyndaryndaǵy masa dernásilderin joiý maqsatynda mamandar «Baktitsid» biologiialyq preparatymen óńdeý jumystaryn júrgizýde.
