Foto ©️ Tengrinews.kz / Turar Qazanǵapov
Pavlodar oblysynda 8-synyp oqýshysynyń júkti bolyp qalǵany úshin aýyl mektebiniń muǵalimderi jazalandy, - dep habarlaidy Massaget.kz portaly.
Kámeletke tolmaǵan balanyń júktiligi úshin mektep direktory, orynbasary jáne synyp jetekshisi qatań sógis aldy. 8-synyp oqýshysynyń júkti bolǵanyna 25 apta ótken. Onyń júkti ekenin synyp jetekshisi baiqaǵan.
"Qyz mektepke qyrkúiekte keldi, keiin qazan boiy aýyrdy. Qarashada sabaqqa kelgende synyp jetekshisi ózgeristerdi baiqai bastady. Biraq balamen mundai jaǵdai bolýy múmkin dep eshkim oilaǵan joq.
Muǵalim muqiiat baqylaǵan, qyzdyń ishi shyǵyp ketkenin kórgende, dereý anasyn shaqyryp, aýrýhanaǵa baryp, balanyń júkti ekenin anyqtady", - deidi aýdandyq bilim bólimi ókilderi.
Oqiǵa týraly muǵalimder politsiia men prokýratýraǵa habarlaǵan. Bilim bólimi málimetinshe, olar berekeli otbasy bolǵan, qyzdy ógei ákesi tárbielegen.
"Aýrýhanada qyzǵa suraq qoiǵanda ógei ákesin kórsetti. Sol kúni er adam ustaldy. Qazir mektep direktoryna, orynbasaryna jáne synyp jetekshisine tárbie jumysyn nashar júrgizgeni úshin qatań sógis jariialandy", - dedi bilim basqarmasy ókilderi.
Politsiia kúdiktiniń ustalǵanyn rastady.
"Bul derek boiynsha Qylmystyq kodekstiń 120-babynyń 4-bóligi boiynsha sotaldy tergeý amaldary júrgizilip jatyr, kúdikti qamaýǵa alyndy. QR Qylmystyq-protsestik kodeksiniń 201-babyna sáikes ózge málimetter aitylmaidy", - dep túsindirdi oblystyq politsiia qyzmetkerleri.
Kámeletke tolmaǵan balaǵa zorlyq-zombylyq jasaǵany úshin er adam 20 jylǵa nemese ómir boiyna bas bostandyǵynan aiyrylýy múmkin. Mektep oqýshysy qashyqtan oqytýǵa kóshti.
