Pavlodardaǵy «Baiantaý» sport saraiynda patsientterdi qabyldaý men diagnostikalaý ortalyǵy, al Moiyldy men Aqsýdaǵy shipajailarda qosymsha provizorlyq statsionarlar ashyldy, dep habarlaidy pavlodarnews.kz.
Pavlodar oblysy ákiminiń baspasóz qyzmetiniń málimdeýinshe, olardyń ázirligin óńir basshysy Ábilqaiyr Sqaqov tekserip shyqqan.
Pavlodarda 2 shildeden bastap triaj-ortalyq óz jumysyn bastady. Ol «Baiantaý» sport saraiynda ashylyp, sol jerde 150 provizorlyq tósek-oryn qoiylǵan. Jedel járdem brigadalary budan bylai patsientterdi aýrýhanalardan bólek, «Baiantaýdyń» ǵimaratyna jetkizedi. Tájiribeli dárigerler óz kezeginde diagnostikadan ótkizip, patsientterdi statsionarlarǵa ornalastyrady. Ortalyq «taza» jáne «las» aimaqtarǵa bólingen, ári árqaisynda sanitarlyq-epidemiologiialyq talaptarǵa sáikes naýqastardy qabyldaý joldary qarastyrylǵan.
— Triaj-ortalyqtyń iske qosylýy aýrýhanalar men jedel járdem qyzmetiniń júktemesin azaitýy tiis, – dedi Ábilqaiyr Sqaqov sport saraiyn aralaý barysynda. — Bul jerde naýqastardyń jaǵdaiyna bailanysty jedel sheshim qabyldaityn tájiribeli dárigerler jumys isteitin bolady. Barlyq meditsina qyzmetkerleri jeke qorǵanys quraldarymen tolyqtai qamtamasyz etilýi qajet. Personaldyń da, patsientterdiń de epidemiologiialyq qaýipsizdigi asa mańyzdy.
«Moiyldy» shipajaiynyń ǵimaratynda birden 500 provizorlyq tósek-oryn qoiyldy. Densaýlyq saqtaý basqarmasynyń mamandary men epidemiologterdiń baǵalaýy boiynsha, bul jer naýqastardyń em qabyldaýyna jaily, al shipajaidyń kirme joldary yńǵaily. Bul ǵimarattyń ishi de aimaqtarǵa bólingen. Atalǵan statsionarǵa jaǵdaiy aýyr emes patsientter jatqyzylady.
Aqsýdaǵy «EEK» AQ emdeý-saýyqtyrý kesheniniń negizinde 70 tósek-oryn, al «Eýraziia» meditsinalyq ortalyǵynda 80 tósek-oryn qoiyldy. Qos ǵimaratta da patsientterdiń jaily, ári qaýipsiz jaǵdaida em alýyna jaǵdai jasalǵan.
- Osylaisha, Pavlodar oblysynda bir kúnde qosymsha 800 provizorlyq tósek-oryndar daiyndaldy. Oblys ákimi aralaǵan barlyq mekemelerdiń qyzmetkerlerimen kezdesip, jedel shtab múshelerine uiymdastyrý suraqtaryn tez arada sheshýdi tapsyrdy, - dedi baspasóz qyzmetinde.
Esterińizge sala keteii k, aimaqtaǵy epidemiologiialyq jaǵdaiǵa bailanysty týyndaǵan máselelerdi jedel sheshý maqsatynda COVID-19-ǵa qarsy sharalardy úilestirýge arnalǵan Jedel shtab quryldy. Shtab tóraǵalyǵyn qolǵa alǵan Ábilqaiyr Sqaqov jumystyń basym baǵyttaryn aiqyndap, árqaisysyna jaýapty adamdardy bekitti. Máselen, provizorlyq statsionarlar boiynsha sharalardy úilestirý mindeti aimaqtyq densaýlyq saqtaý salasyndaǵy tájiribeli sarapshy oblystyq onkodispanserdiń direktory Murat Súleimenovke júkteldi.
