Pavlodar oblysynda «7-20-25» baǵdarlamasy iske aspai tur. Bul týraly búgin «Nurly jer» baǵdarlamasynyń iske asyrylýy qaralǵan Úkimet otyrysynda Premer-Ministr Asqar Mamin aitty, dep habarlaidy QazAqparat tilshisi.
«Bolat Jumabekuly, oblysta aǵymdaǵy jyldyń eki aiynda turǵyn úige salynatyn investitsiia ótken jyldyń osyndai kezeńimen salystyrǵanda 30 paiyzǵa tómendegen. Sondai-aq, turǵyn úilerdi paidalanýǵa berý kórsetkishi tómendep, ótken jylmen salystyrǵanda 50 paiyzǵa azaiyp otyr», - dedi otyrys barysynda Úkimet basshysy Pavlodar oblysynyń ákimi Baqaýovqa qarata.
Óz kezeginde Pavlodar oblysynyń ákimi ótken eki aida shynymen de qurylys salasyndaǵy kórsetkishter oryndalmaǵanyn moiyndady.
«Toqsan qorytyndysynda oń dinamikany qamtamasyz etemiz. Ósim 110 paiyzdy quraidy. Bir merdigerler «Saryarqa» shaǵyn aýdanynda 10 myń páterdi úlgermedi», - dedi oblys basshysy.
Osy oraida Premer-Ministr Pavlodar oblysynyń ekonomikalyq jáne óndiristik áleýeti óte joǵary ekenin atap ótti.
«Ortasha eńbekaqy joǵary deńgeide jáne Turǵyn úi qurylys jinaq bankiniń salymshylary óte kóp. Biraq, óńirde «7-20-25» baǵdarlamasy iske aspai tur. Respýblika boiynsha jalpy 6 myń ótinish maquldansa, sizderde ol nebári 77 ǵana, iaǵni bir paiyz», - dedi Asqar Mamin.
Bolat Baqaýov qazirgi ýaqytta «7-20-25» baǵdarlamasy boiynsha ekinshi deńgeili bankter 181 ótinim qabyldaǵanyn aitty.
«Sonyń ishinde búgingi kúni 80 ótinim maquldandy. Qazirgi ýaqytta osy baǵdarlama arqyly iske asyrýǵa oblysta 283 páter bar. Buǵan qosa, ENRC kompaniialar toby óz qyzmetkerlerine 2019 jyly 350 páterdi osy baǵdarlama boiynsha satyp alý kelisimin jasady. Birinshi jartyjyldyqtan keiin osy kórsetkishterdi durystaimyz», - dep ýáde berdi Pavlodar oblysynyń ákimi.
