Pavlodar oblysynda 150-den astam kólik qar qursaýynan shyǵarylyp, 140 adam jylytý pýnktterine jetkizildi, onyń 15-i - bala, dep habarlaidy QazAqparat Pavlodarnews.kz saityna silteme jasap.
5 naýryz kúni saǵat 12:30-da boranǵa, nashar kórinýge, aýa raiynyń nasharlaýyna bailanysty Nur-Sultan - Shiderti tas jolynyń 200-254 shaqyrymynda Shiderti kentinen Aqmola oblysynyń shekarasyna deiingi avtomobil jolynda kólik quraldarynyń barlyq túrleri úshin qozǵalys jabyldy.
- Jeldiń kúsheiýine bailanysty qozǵalys eki baǵytta da jabyldy. Biraq sol ýaqytta 500-ge jýyq kólik Nur-Sultannan shyǵyp ketken bolatyn. Sonyń ishinde joldyń kórinbeýinen, daýyldyń saldarynan qar qursaýynda qalǵandar bar. Pavlodar oblysyna kirip úlgergen kólikter sany - 150-170, - dedi «QazAvtoJol» AQ oblystyq filialynyń direktory Aqylbek Qabyldin óńirlik kommýnikatsiialar qyzmetinde ótken jiynda.
Jol qyzmetkerleri joldy tazalaýdan jeńil mashinalardan júk kólikterine deiin qarǵa keptelgen mashinalardy shyǵarýǵa kóshti.
Aita keteiik, keshe keshke Semeige shyǵatyn baǵyttan basqa, Pavlodar oblysy arqyly ótetin barlyq respýblikalyq joldar jabyldy.
Qazir kólikterdiń kolonnalary bir qatarǵa jinaqtaldy. Qatardyń aldyńǵy jáne artqy jaǵynda jol qyzmetkerleriniń kólikteri bar. Arnaiy tehnikanyń súiemeldeýimen kele jatqan kolonna saǵatyna 5-10 shaqyrymnan aspaityn jyldamdyqpen qozǵalyp keledi.
Aqylbek Qabyldinniń aitýynsha, eń kóp degende eki saǵat ishinde barlyq mashinalar qardan shyǵarylyp, Shiderti kentine deiin jetkiziledi. Bul ýchaskede 10-nan astam tehnika jumys isteýde.
Oblystyq tótenshe jaǵdailar departamentiniń basshysy Ernur Ótegenovtiń aitýynsha, túnde 5 jylytý pýnktine 140 adam ákelindi, onyń 15-i balalar. 61 adam qutqaryldy, onyń 11-i balalar. 63 adam evakýatsiialandy, onyń ishinde 7 bala bar. Sondai-aq qar qursaýynan 32 jeńil jáne 3 júk kóligi shyǵaryldy.
- Daýyl týraly eskertý eki kún buryn berilgen. Aqmola oblysy baǵytynda kúrdeli jaǵdai qalyptasty. Sondyqtan keshe saǵat 14:30-da biz shtab pen senim telefonyn ornalastyrdyq. Oǵan 9 qońyraý tústi. Jolda balalarymen birge qalǵan bir avtokólik júrgizýshisine psihologiialyq kómek kerek boldy. Olar qaýipsiz jerge jetkizildi, - dedi Ernur Ótegenov.
Sonymen qatar, Jelezin aýdanynda túnde 50-ge jýyq kólik keptelip qaldy. Munda jylytý pýnkti «Arman» sport kesheninde, sondai-aq Tereńkól aýdanynda Fedorovka aýylyndaǵy «Samal» kafesinde ashyldy. Aqtoǵai aýdanynda Qojamjar aýylynda 7 adam agrotehnikalyq kolledjge evakýatsiialandy.
Tótenshelikter taǵy eki balyqshyny qutqardy. Olardyń kóligi Ekibastuz mańyndaǵy 11-sorǵy stantsiiasynda isten shyqqan.
Qazir Pavlodar oblysynyń Aqmola oblysy baǵytyndaǵy 9 joly jabyq.
- Biz kólikterdi shyǵarmaiynsha, qardy tazalaý qiyn, - dedi Ernur Ótegenov. - Túnde jumys júrgizildi. Bas tartqandar kólikterinde qaldy, al ony qalamaǵandar evakýatsiialandy. Tehnikalar jumys istep tur: 2 jol talǵamaityn TREKOL jáne 2 KamAZ.
