Issapar shyǵyndary men memlekettik satyp alý sharalarynan 11,1 mln teńge jymqyrdy degen kúdikke ilingen Pavlodar oblysynyń Sáýlet basqarmasynyń bir top qyzmetkerine sot úkimi shyǵaryldy, dep habarlaidy QazAqparat.
Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Daniiar Begaidarov ANTIKOR News aqparat alańynda ótken brifingide osyndai málimet aitty.
«Pavlodar oblysynyń Sáýlet basqarmasynyń burynǵy basshysy, basqarma basshysynyń mindetin atqarýshy, ákimshilik bólim basshysynyń mindetin atqarýshy, ákimshilik bólimniń bas mamany ári bas býhgalteri issapar shyǵystary men memlekettik satyp alý arqyly taýar qabyldaý aktilerin qoldan jasaý arqyly jalpy somasy 11 124 738 teńge biýdjet qarajatyn jymqyrdy dep aiyptalǵan bolatyn», - deidi Daniiar Begaidarov.
Sot úkimi boiynsha basqarma basshysy N.O. Kakambetov 3 jyl merzimge bas bostandyǵynan, memlekettik qyzmette ómir boiyna laýazym atqarý quqyǵynan aiyryldy.
Al basqarma basshysynyń mindetin atqarǵan A.B. Sharbanov 2,5 jylǵa merzimge bas bostandyǵynan, ómir boiyna memlekettik qyzmette jumys isteý quqyǵynan aiyryldy.
«Basqarmanyń ákimshilik bóliminiń basshysy Q.T.Baltabaevaǵa dál osyndai jaza taǵaiyndaldy. Sot onyń jas balalary bar ekenin eskerip, úkimdi oryndaý merzimin 5 jylǵa keiinge qaldyrdy. Bas býhgalter de 2,5 jylǵa sottaldy», - dedi agenttiktiń asa mańyzdy ister jónindegi tergeýshisi.
