Pavlodar munai-himiia zaýyty jóndeý jumystaryn merzimnen buryn aiaqtap, iske qosý operatsiialaryn bastady. Bul týraly «QazMunaiGaz» UK» AQ-nyń baspasóz qyzmetinen málim etti, dep habarlaidy QazAqparat.
1 qarashadan «PMHZ» JShS barlyq ónim túrlerin qaita shyǵara bastaidy. Qolaisyz klimattyq jaǵdailarǵa qaramastan, zaýyt jóndeý jumystaryn merzimnen buryn oryndap shyqty.
«Barlyǵy 933 birlik tehnologiialyq qubyrdyń, 19 birlik tehnikalyq bý qubyrdyń jáne 300 birlik qural-jabdyqtyń tehnikalyq kýálandyrylýy, reviziiasy men saraptamasy júrgizildi. Zaýytty jóndeý barysynda birqatar iri jumystar atqaryldy: munaidy bastapqy óńdeý óndirisinde kolonna aýystyryldy, quramynda sýtegi bar gaz jelisi men sý qainatqyshy jóndeldi, munaidy tereń óńdeý óndirisinde peshterdiń gaz ótkizgishteri, transferlik jeli, qosarlanǵan jylý almastyrǵysh pen separatorlar aýystyryldy. Munaidy bastapqy jáne tereń óńdeý óndiristerinde biiktigi 180 jáne 120 metr tútin murjalarynyń korroziiaǵa qarsy qorǵaý jumystaryn atap ótken jón. Jóndeýge kásiporyn qyzmetkerlerinen bólek, merdigerlik uiymdardyń 1241 jumyskeri jumyldyryldy», - delingen kompaniia málimetinde.
Aita keteiik, biyl Pavlodar munai-himiia zaýytyn jóndeý jumystarynyń merzimi úsh ret keiinge qaldyrylǵan bolatyn.
