Pavlodar oblysynyń jańa basshysy Ábilqaiyr Sqaqov Pavlodar qalasynyń ataýyn ózgertýge qatysty týyndaǵan kelispeýshilikter jaily pikir bildirdi, – Sputnik Qazaqstan.
Oblys ákimi 2020 jylǵy sanaqtyń sońyna deiin bul másele qarastyrylmaitynyn taǵy da eske saldy.
"Qala ataýyn ózgertý máselesi kún tártibinde turǵan joq. Tek ataýdy ózgertý arqyly barlyq másele birden sheshimin tapsa ǵoi... Bul jerde aqsha jumsaý, belgilerdi ózgertý, barlyq qujattama máseleleri bar. Ol bizneske de, memlekettik organdar úshin de aýqymdy jumys bolmaq. Bul máseleniń tek bir jaǵy ǵana", - dep atap ótti Sqaqov tilshilermen kezdesý barysynda.
"Iá, árine, bul qalanyń tarihi mádenietimen, paida bolýymen jáne qalyptasýymen bailanysty basqa da nárseler bar. Biraq, meniń oiymsha, bul máseleni birinshi kezekke qoiýdyń esh qajeti joq", - degen oblys basshysy odan góri kúsh-jigerdi óńirdegi basqa máselelerdi sheshýge jumsaý kerektigin alǵa tartty.
Aita ketsek, qaladaǵy birneshe bastamashyl top jáne qoǵamdyq birlestik ókilderi, aqsaqaldar Pavlodar ataýyn Saryarqa nemese Ertis dep ózgertýdi usynǵan edi. Sońǵy ataýdy májilis depýtaty Aizada Qurmanova qoldap otyr. 2019 jyly qalany Kenesary hannyń atymen ataý, oǵan deiin Kereký dep ózgertý jaily usynystar túsken bolatyn.
Qala ataýyn ózgertý týraly másele turǵyndar arasynda pikirtalas týdyrdy. Tipti, Pavlodar qalalyq ákimdigi 2020 jyly ulttyq sanaq ótkiziledi degen resmi málimdeme jasaýǵa májbúr boldy. Sanaqtyń ýaqytyly ári tiianaqty ótýin qamtamasyz etý úshin 2020 jyldyń 1 qańtarynan 31 jeltoqsanǵa deiingi kezeńde onomastikalyq sipattaǵy máseleler, onyń ishinde oblys ortalyǵynyń ataýyn ózgertý máselesi qarastyrylmaidy.
