Patreon qaiyrymdylyq platformasy "Vernis jivym" ýkrain qoǵamdyq uiymynyń paraqshasyn óshirdi, - dep habarlaidy Tengrinews.kz.
Bul týraly Facebook-paraqshasynda Donbasstaǵy ýkrain sarbazdarǵa kómektesetin qor toby málimdedi.
"Patreon qor paraqshasyn joidy. Eskertý jasamastan. Ýkraina úshin óte qiyn ýaqytta. Resmi ótinishter daiyndap jatyrmyz. Paraqshamyzdy buǵattaý deregi týraly aqparatty taratýǵa shaqyramyz. 250 myń dollardan astam aqsha qaida ketkeni/buǵattalǵany belgisiz", - dedi qor ókilderi.
Qor direktory Taras Chmýt 23 aqpanda, bir táýlik ishinde kópshilik "Vernis jivym" qoryna Ýkraina Qarýly kúshterin qoldaýǵa 673 myń dollardan (shamamen 314 million teńge) astam qarajat aýdarǵanyn atap ótti. Bul soma qordyń 2021 jylǵy jyldyq qoldaýynan asyp túsedi.
Patreon paraqshany óshirý sebepterine qatysty pikir bildirip, platformada jinalǵan qarajatty áskeri tehnika satyp alýǵa jumsamaý kerek ekenin aitty.
"Halyqtyń Ýkrainadaǵy gýmanitarlyq qyzmetti qoldaýǵa degen umtylysyn túsinemiz. Patreon platformada jinalǵan qarajatty zorlyq-zombylyqty qoldaý nemese áskeri tehnikany satyp alý úshin paidalanýǵa ruqsat bermeidi. Tergeý kezinde naýqandy toqtattyq. Eger tergeýden keiin paraqsha joiylsa, qarajatty paraqshany qurýshyǵa jiberemiz nemese barlyq mindettemeni qaitaramyz", - dep túsindirdi platforma ókilderi.
"Vernis jivym" - ýkrain qoǵamdyq uiymy. Ol ýkrain sarbazdarǵa kraýdfanding negizinde Donbasstaǵy soǵysta kómektesedi. Bul osy salada jumys isteitin eń iri uiymdardyń biri jáne tehnikalyq qoldaýǵa mamandandyrylǵan, ásirese termografiialyq kameralar men túngi kórý quraldary. Sonymen qatar, ol bilim berý, meditsina, psihologiia jáne basqa da jobalardy júzege asyrady.
