Armeniiada premer-ministr mindetin atqarýshy Nikol Pashinian kezekten tys parlament sailaýynda jeńiske jetkenin málimdegennen keiin negizgi oppozitsiialyq blok sailaý nátijesin moiyndamaitynyn aitty, dep jazady Azattyq.
Sailaý biýlletenderiniń jartysynan astamy eseptelgennen keiin Nikol Pashiniannyń "Azamattyq kelisim" partiiasy sailaýshylardyń – 58,5 paiyz daýysyn, al burynǵy prezident Robert Kochariannyń blogy 18,8 paiyz daýys alǵany habarlandy.
"Armeniia halqy "Azamattyq kelisim" partiiasyna eldi basqaryp, meni premer-ministr retinde qyzmet etýge ókilet berdi. Biz sózsiz jeńiske jettik jáne parlamenttegi oryndardyń basym bóligine ie bolamyz" dedi Pashinian 21 maýsymǵa qaraǵan túni. Ol keshke qarai jaqtastaryn Erevandaǵy ortalyq alańǵa barýǵa úndedi.
Kóp uzamai Kocharian blogy sailaýdaǵy zańbuzýshylyqtar tolyq anyqtalmaiynsha nátijesin moiyndamaitynyn habarlady.
"Sailaý ýchaskelerinen uiymdasqan jáne josparly túrde daýys burmalanǵany jaily júzdegen habarlama sailaý nátijesine senimsizdik týdyrady" delingen blok málimdemesinde.
Sailaýaldy áleýmettik saýalnama Pashinian men Kochariannyń jańadan qurǵan blogy arasynda tartystyń qyzý bolatynyn kórsetken.
Kezekten tys parlament sailaýy byltyr kúzde alty aptaǵa sozylǵan Taýly Qarabaq úshin soǵystan keiin týyndaǵan saiasi daǵdaryspen tuspa-tus kelip otyr. Soǵystan keiin Armeniia Ázerbaijan jaǵyna Taýly Qarabaqtyń edáýir bóligin qaitarǵan.
2018 jyly halyq tolqýy kezinde bilikke kelgen Pashiniannyń bedeli soǵysqa deiin 60 paiyz bolsa, soǵystan keiin 24 paiyzǵa deiin tómendep ketken. Biraq soǵan qaramastan sarapshylar Pashinian myńdaǵan adamdy áli de sońynan erte alatynyn kórsetti dep sanaidy.
Sailaýǵa daýys berýge quqyǵy bar azamattardyń 49,4 paiyzy qatysqan. (Iaǵni, 2 593 572 adamnyń 1 281 174-i daýys bergen).
Zań boiynsha, parlamentke ótý úshin partiialar keminde – 5 paiyz, bloktar 7 paiyz daýys jinaý kerek.
Daýys berý kezinde partiia ókilderi, baqylaýshylar men quqyq qorǵaý organdary birqatar zańbuzýshylyqtar bolǵanyn habarlady. Atap aitqanda, aimaqtarda sailaýshylardy satyp alý, olarǵa qysym jasaý, daýys berý protsedýrasynyń saqtalmaýy siiaqty zańsyzdyqtar tirkelgen. Sailaýmen bailanysty keminde eki atys bolǵan.
