Búgin Parlament palatalarynyń birlesken otyrysynda Májilis tóraǵasy Erlan Qoshanov Parlamenttiń osy sessiiasy barsha qazaqstandyq qoǵam úshin airyqsha jaýapty kezeńde ótkenin aitty, dep habarlaidy QazAqparat.
«Búgin biz jetinshi sailanǵan Qazaqstan Respýblikasy Parlamentiniń ekinshi sessiiasynyń jumysyn aiaqtap, qorytyndylap otyrmyz. Osy sessiianyń negizgi strategiialyq basymdyqtaryn Qazaqstan Respýblikasynyń Prezidenti Qasym-Jomart Kemeluly Toqaev ótken jylǵy qyrkúiekte sessiianyń ashylýynda, sondai-aq Qazaqstan halqyna Joldaýynda aiqyndap bergen bolatyn. Ótken kezeńde Parlamenttiń qyzmeti belgili oqiǵalar men mańyzdy sheshimderge toly boldy. Birinshiden, biylǵy sessiia Qazaqstan Respýblikasy Táýelsizdiginiń 30 jyldyǵy aiasynda ótti. Bul elimizdiń basty memlekettik merekesi ǵana emes, barsha qazaqstandyqtardy biriktiretin ulttyq tarihi mańyzdy kezeń. Ekinshiden, Táýelsizdiktiń 30 jyldyǵyndaǵy mańyzdy kezeńderdiń biri – Qazaqstan Respýblikasy Parlamentiniń 25 jyldyq mereitoiy. Parlamenttiń qalyptasýy men damýy egemen Qazaqstannyń taǵdyrymen tyǵyz bailanysty. Úshinshiden, el damýyndaǵy jańa kezeńniń bastalýyn bildiretin Konstitýtsiiaǵa túzetýler jónindegi respýblikalyq referendým boldy», - dedi Qoshanov.
Osy oraida ol Parlamenttiń osy sessiiasy barsha qazaqstandyq qoǵam úshin airyqsha jaýapty kezeńde ótkenin atap ótti.
«Eń aldymen, biz eki jylǵa sozylǵan koronavirýs pandemiiasyn eńserip qana qoimai, ortaq kúsh-jigerimizdiń arqasynda aitarlyqtai nátijelerge qol jetkizdik. Densaýlyq saqtaý júiesindegi tásilder ózgertildi, bilim berý salasynda oqytýdyń jańa standarttary engizildi, biznestiń, bank jáne qarjy qurylymdarynyń, qyzmet kórsetý jáne kólik salasynyń jumys formaty ózgerdi. Koronavirýs pandemiiasy kezeńindegi shekteý sharalary Parlamenttiń qyzmetine de óz ereksheligin engizdi», - dedi Májilis tóraǵasy.
«Qańtarda elimiz úlken qaterden aman-esen shyqty. Mundai oqiǵa memleketimizdiń jańa tarihynda buryn sońdy bolmaǵan. Soǵan sai, der kezinde jáne jedel áreket etý qajet boldy. Memleket basshysy Qasym-Jomart Kemeluly Toqaevtyń jigerli sheshimderi eldi terroristik soqqydan aman alyp shyǵyp, jaǵdaidy qysqa merzim ishinde turaqtandyrdy. Bul bizdiń elimiz ben memleketimizdi saqtaý jolyndaǵy birden-bir durys ári baiypty qadam boldy. Osyndai kúrdeli kezeńde, Memleket basshysy Parlament qabyrǵasynda Qazaqstan halqyna Joldaý jasap, aýqymdy saiasi jańǵyrtý baǵdarlamasyn usyndy. Saiasi transformatsiianyń negizgi ózegi – jańa ári ádiletti Qazaqstan qurý, barlyq qazaqstandyqtarǵa birdei múmkindikter jasaý. Al ótken referendýmnyń qorytyndylary qazaqstandyqtardyń basym kópshiliginiń Prezidenttiń saiasi jańǵyrtý baǵdarlamasyn qoldaitynyn kórsetti», - dedi Erlan Qoshanov.
Budan buryn habarlanǵandai, Qoshanov ekinshi sessiianyń zańnamalyq kún tártibi aitarlyqtai mazmundy bolǵanyn aitty.
«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessiia kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.
